【點新聞報道】Gin Lee李幸倪今年第二首新歌《白夜行》上架，這次更是「近水樓台」找來剛於啟德開完show的大師兄謝霆鋒出手作曲兼監製。
Gin笑言今次是「膽粗粗」邀歌，自爆當初只抱住「隨緣啦，佢咁忙邊得閒理我？」的心態，想不到霆鋒真的擺上心，寫了一首Gin都覺得「入行以來數一數二難唱」的歌給她，而霆鋒則謂：「最鍾意幫人寫咁變態難唱嘅歌。」果然是「處女座Crossover」，一個夠糾結，一個夠變態！
Gin透露霆鋒寫歌前做足功課，將她的舊作都聽了才落筆，「特登寫咗咁難嘅歌俾我，激發我嘅潛能，呢個係佢嘅一番好意，我亦都非常樂意去接受呢一個挑戰。」隨後霆鋒又透過經理人問她三個「個人Keywords」：「我糾結咗好耐，最後淨係交到『無拘無束』同『自由奔放』兩個，第三個真係諗爆頭都諗唔出！」後來霆鋒見到她更搞笑投訴：「你呀！叫你俾三個，你俾兩個！一定係糾結到死啦！」新歌難唱到程度令Gin錄足三日，去到第三日錄音，霆鋒更於自己開演唱會前12日親自監場，令她受寵若驚。
今次MV遠赴雲南小鎮取景，Gin自嘲「擺咗個大烏龍」，「出發前睇咗天氣報告以為好凍，帶曬啲冬天衫同羽絨，點知去到先發現原來當地30幾度。最後羽絨冇用，要靠退熱貼同風扇續命！」雖然拍到天光兼「靈魂出竅」，但Gin見到成品都即時「WOW」一聲：「內地團隊超專業，早幾日就去現場Rehearsal，每個鏡頭都十分精準，靚到癲！」
（點新聞特約記者陳惠芳報道）
相關閱讀：
收藏
取消收藏
分享
稿件由上傳 · 文責自負 · 不代表本網立場
