文/稀思路
筆者寫文都講過唔止一次，攬炒派或者反對派，並唔係一班志同道合之士，佢哋當中好多人，係「搵食一族」，例如黑暴運動時，有人就借機眾籌，但數目不明不白；甚至有人講大話去籌錢，點知部分錢去咗馬會，「齊上齊落」對某啲人嚟講就係「齊齊搵水」。最近，喺香港僅餘無幾嘅反對派網媒——Channel C，就涉嫌詐騙兼欠薪，筆者唔會對呢啲事件意外，但Channel C出事，筆者好奇一班反對派政客、記協之流，要唔要出嚟講下嘢，幫下Channel C啲員工呢？又係一涉及錢同搵水，就全部自我噤聲？
過去半個月，關於Channel C嘅新聞真係一啲都唔少，首先喺月中，警方就偵破咗騙政府「百分百擔保特惠貸款」案件，4間公司涉及詐騙款項超過2000萬元，其中涉嫌騙款最多嘅就係一間叫 Artview Media Production 嘅公司，涉詐騙金額可能高達900萬元，而 Artview Media Production 嘅主要業務，就係營運網媒Channel C。
涉嫌詐騙，即係有錢已經落袋，應該都有啲錢喺手啦，但係呢，Channel C就傳出拖欠員工薪金，據悉，Channel C全體29名編輯部員工，被拖欠薪金、強積金同雜費總共66萬元，有員工被拖糧長達3個多月，絕大部分員工強積金供款被拖欠至少6個月，依家應該全體員工停工、休假或者已經離職。
依家嘅Channel C，仲被債權人貼上接管信，有趣嘅係，據講有關文件未喺公司註冊處完成註冊，債權人話要接管公司，而原僱主就話未收到法庭指示，仍然「掌控」住Channel C。呢種內鬥，同違法「佔中」、黑暴運動時嘅攬炒派式內鬨，真係一模一樣。
對於Channel C涉嫌詐騙、欠薪、欠強積金一事，筆者呢兩星期，「如常日日上網」睇唔同平台，似乎都冇睇到啲反對派政客、政黨以至媒體有批評Channel C，但就喺網上見到有個群叫做「Channel C苦主大聯盟」，話Channel C已經冇更新，佢哋嘅訂閱費凍過水，又話有十幾個朋友喺呢兩星期先續訂年費。Channel C涉及詐騙後，人工唔畀，強積金繼續拖，如果真係仲識收人訂閱費，呢種「收檔但照收錢」嘅作風，認真識玩！
按照過去經驗，媒體有事，尤其係反對派媒體有事，「正義記協」應該會出嚟講下嘢，但有傳媒就報道，記協似乎對事件相當冷淡，因為有網媒向記協主席鄭嘉如查詢，鄭嘉如就話有收到勞資查詢，但佢哋「狀態似有啲混亂，員工都想知有咩保障」，一兩句狀態混亂，就唔理？但筆者記得，鄭嘉如之前被炒，好似仲話要告人，依家一班同行係連人工都未出返，但記協就唔理，其實記協仲有冇作用？係咪可以執埋一份？
部分網民十分心水清，有網民就直接指出，Channel C擺明呃錢，又有網民笑Channel C，話佢哋一路鬧政府，原來走去呃政府錢；亦有訂閱苦主話試過用唔同方法聯絡Channel C，但都係完全冇人回覆。筆者喺度諗，涉嫌呃政府貸款係一筆數，繼續大收訂閱費又係一筆數，依家一班員工被拖糧、拖強積金咁耐，到底係Channel C真係蝕錢蝕入肉，定係有人「賺錢賺到笑」？希望執法部門以至法庭處理案件時，可以公開Channel C盤數，等啲Channel C支持者，可以知道自己啲訂閱費去咗邊，就算最終有人攞錢去馬會賭，起碼都叫有個「知」字呀嘛！
收藏
取消收藏
分享
