【點新聞報道】《阿姐Diva汪明荃演唱會2025》澳門站日前圓滿完成，全場爆滿，場面熱鬧。
阿姐一出場先唱出《閃爍登場》和《迷人PINK LADY》，之後她說：「真係好耐冇嚟澳門啦，上一次已經係隔離嘅時候，係2022年，我記得果陣時係要隔離14日先可以出嚟唱歌。大家有冇留意我海報logo呀，由左至右讀就係英文嘅DIVA，但係你當睇中文又得喎，係寫住《阿姐》，其實咩稱呼都係一句啫，DIVA又好，阿姐又好，汪明荃仍然係汪明荃係Liza。」
阿姐唱出鄧麗君四首金曲，之後傳來了家英哥的聲音：「好嘢，冇得頂呀，不過阿姐唱歌嘅內容令我好心驚。」阿姐問：「好心驚？」家英哥：「你叫我路邊野花不要採吖嘛。」阿姐：「你自己對號入座啫。」家英哥：「我聽你話所以我路邊野花不要採，我就採我嘅家花。」此時家英哥拿出一枝玫瑰花送給阿姐，家英哥問：「大家認為我係咪一個合格嘅老公？」此時台下掌聲不斷，阿姐：「嘩，好多人撐你呀！」家英哥：「妳咁樣講法證明你有眼光搵到個好老公。」阿姐：「你講嘢都幾動聽，咁就將以下時間交畀你。」在一番台上打情罵俏後，阿姐便回後台換衣服，家英哥：「多謝晒，其實太后搵我唱歌嘅原因係太后帶咗好多靚衫嚟，咁換衫就需要時間，咁呢個時間搵邊個去襯呢？咁梗係搵老公去做呢？這次我選唱每逢4月1號我都好掛住一個朋友張國榮，我同佢一齊做過好多套戲，我哋好多嘢講，我送呢首歌畀大家《儂本多情》。」
接近尾聲，阿姐送上最後一曲《勇敢的中國人》。在encore部分，Liza姐先唱出了《熱咖啡》，接着她說：「我今日係歌手，聽日可以係粵劇嘅演員，我亦有做行政工作，每一個崗位我都盡心盡力去做，因為我知道大家對汪明荃係有好高嘅期望，多謝大家陪我一齊行呢條娛樂之路。」最後她和家英哥合唱了《萬水千山總是情》，並為今次演唱會澳門站畫上完美句號。
（點新聞特約記者陳惠芳報道）
收藏
取消收藏
分享
