【點新聞報道】「不速之客」登堂入室！近日一名女生在網上發文，表示家中突然被一隻野生猴子闖入，更即席享用家中的生果，令人哭笑不得。影片引來不少留言，「佢好醒，知道柑皮唔食得，食得好滋味」、「真識食⋯仲識揀走啲絲」。
該名住沙田的女生日前社交平台threads發文表示，「以為自己開錯cam。Btw食完巨峰再食柑，仲食到japjap聲，個柑應該好甜，屋企有馬騮已打敗99%香港大學生。」從其上載的影片可見，該隻猴子闖入她的家中，在鏡頭前大快朵頤，一手拿起大柑剝皮享用，十分愜意。
樓主表示，家中有養貓貓，故有安裝家居Cam，「有裝窗網，但應該係老化所以畀馬騮整開，所以先有今次嘅事⋯⋯亦即刻Fix（修理）返個窗網，都安排新嘅安裝。貓貓盡力呵返了，冇受傷。」她又指，「好彩冇正面接觸到，勁污糟！」
影片引起不少網民熱議，「啲馬騮好生猛」、「佢好醒，知道柑皮唔食得 食得好滋味」、「小心隻貓畀佢捉咗啊」、「點解我會覺得可愛」、「有冇留低食晚飯，唔使急住走喎」、「馬騮界foodie，仲食到japjap聲」、「真識食⋯仲識揀走啲絲」。
有網民則分享自身經驗，「好細個都發生過，我仲要住12樓喎，食埋全屋最貴嗰個日本桃」、「你擺定碌棍係屋企啦！呢個係我老同嘅經驗之談」、「佢入過嚟一次，就會認住你間屋有餐開之後成日嚟幫襯。呢段時間最好屋企冇人時閂好晒門窗，啲食物都要收起晒唔好外露，除非你想同佢做friend。」
收藏
取消收藏
分享
