【點新聞報道】「新牌仔」經驗未足夠應付多變的路面狀況，一名港媽在網上發文指，自己去年「剛甩P牌」，由荃灣駕駛私家車前往九龍塘接兒子放學，其間不知道右邊後轆爆軚，只是覺得「比油嘅時候架車好似唔係好夠力去」，幸好去到燈位停低時，獲一名好心男司機的提醒，並轉程返轉頭幫她換軚，雖然最終換軚不成，但港媽心懷感激，形容「見到佢嘅時候真係猶如見到天使」。
該名港媽在社交平台threads發文表示，去年5月17日下午4時左右，「揸車由荃灣去九龍塘接仔放學，由於當時我係剛甩「P牌」嘅新牌仔，冇試過呢啲經驗，而且揸車其間唔覺得有咩特別唔妥，只係覺得比油嘅時候架車好似唔係好夠力去，同埋去呈祥道嘅時候架車行得比較扽，但係平時行嗰段路都係比較扽，所以我冇為意，一路都唔知爆咗軚」。
幸好去到燈位停低時，獲一名熱心男司機的提醒，「直至去到澤安道龍悅道個燈位停低時，左邊車嘅司機哥哥示意我拉低窗，然後話我知爆咗軚，我當時諗住差不多到阿仔學校，想話去到學校門口先處理，但係司機哥哥話見我條軚爆得好犀利，驚我捱唔到去學校，建議我慢慢駛架車去前少少停埋一邊。」
樓主形容當時「都好慌好亂，因為未試過呢啲情況，都唔知點算好，我過咗燈位後就將架車停喺歌和老街巴士站前面，然後打電話比我老公求救」。正當她徬徨無助之際，見到該名男司機折返回來，「正當我同老公講緊電話嘅時候，見到剛才嘅司機哥哥向我嘅方向行緊過嚟，當下實在太感動喇！司機哥哥實在太好人，佢泊咗架車喺前面達康路然後再行返轉頭嚟幫我。」
港媽憶述，該名司機估計她的車尾有後備車軚，「佢就陪我上車教我慢慢將架車泊去前面達康路，然後再嘗試幫我換軚， 但因為條軚都爛得幾犀利，最後司機哥哥都拎唔到條軚出嚟，由於司機哥哥本身都係準備去接仔放學，所以最後都係要離開，最後我都係打比老公叫佢幫我叫拖車。」
港媽表示，「雖然最後係換軚不成，但其實呢個並唔重要，最重要嘅係司機哥哥特登走返轉頭嚟幫我」，形容「當刻見到佢嘅時候真係猶如見到天使，佢穩住我又驚又慌又無助嘅情緒，呢個先係幫到我最大嘅忙。」但當刻太慌亂趕急，沒有好好道謝，因此特意發文「希望好心哥哥睇到我呢個帖文，真的萬分萬分感謝你」，同時祝願對方一家永遠幸福安康。
有網民看過當日的爆軚相片後，留言「條軚經歷過乜嘢會爛成咁？ 」、「搞到咁都繼續行你都犀利嘅，都係交番個牌出嚟啦 」，港媽回覆道：「其實我都好憎揸車，對車係零認識，可以話係白痴，我都係被迫去考牌，又咁符碌比我one take pass，唔係因為要接送仔sss返學，我都唔想揸車」，她最後懇求「各路英雄，比次機會小妹」。
有網民就留言提醒港媽日後要加倍注意，「下次留意吓，只要揸車同平時有啲唔同，就要泊埋一邊。盡快處理。如果覺得自己係感覺唔到嘅，可以睇軚壓，咁揸車實你就會知道自己啲呔壓正唔正常」、「冇出意外都真係好彩，下次feel到架車有問題，記住即刻喺安全地方停車檢查完先繼續行」。
收藏
取消收藏
分享
