筆是機場｜何君堯為移英港人發聲捱批　暴露「黃絲」盲反思維

文/稀思路

君子同小人，有咩分別？成日話君子坦蕩蕩，小人呢，就係你對佢唔好，梗係會報復啦；但就算你對佢好，佢一樣會話你、猜度你。最近有個例子，話說，立法會議員何君堯日前喺聯合國⼈權理事會會議發言，為持BNO簽證嘅移英港⼈發聲，睇返內容，其實何君堯真係幫持BNO嘅移英港人發聲，但係網上呢，就有唔少人批評何君堯。咁即係點，黑暴時批評你哋唔得，到你哋移英維護你哋權利，又係錯？

睇返新聞，何君堯發言時就話，通過BNO計劃移居英國的港人，即使佢哋當中有好多都有高技能同專業資格，都未能喺當地重拾專業崗位，被貶至低技術工作，就業、融入社會都遇到障礙，並批評英國政府利用同香港嘅歷史聯繫，借吸引香港移民「榨取金錢」嚟解決困境。

一路聽落去，一路都覺得何君堯講得有道理，佢仲話BNO計劃無辦法保證港人一定可以攞到英國國籍，以致佢哋處於不穩定同不明朗情況；呼籲英國糾正同保障BNO移英港人，以確保佢哋嘅權利同尊嚴。

讀者們可以睇睇以上何君堯講嘅嘢，講得啱唔啱，如果係正常發言，其實啲人鬧咩呢？有專業人士去到英國變低技術工人，唔係事實？又或者，英國加不同費用，又唔多福利畀移英港人，唔係「榨取金錢」又係咩？如果因為何君堯政治立場而反對佢，咁反對派或者「黃絲」，似乎仲未走出「對人不對事」嘅盲反思維。

何君堯發言中，筆者感受最深嘅，就係英國其實真係無保證BNO持有人最終一定會得到英國永久居留權，前排，英國最大在野黨保守黨黨魁巴德諾赫受訪，話移民人士要由住滿6年（5+1）變15年（10+5），又話唔應該畀有犯罪紀錄同攞過福利、社會房屋嘅人申請永久居留權；雖然事後，各方都話無呢回事或者唔關BNO事，但係整個歐洲一直反移民，如果英國下次大選係由極反移民嘅政黨上台，邊個話佢哋一定會保護持BNO簽證移英人士呢？

今次何君堯嘅公開發言，容許筆者用一個中立啲角度睇，大家都係香港人，都尊重唔同人嘅決定；但係英國，開出BNO「5+1」計劃喇，香港人去到，專業冇咗，支援又冇，仲要個永久居留權係咁uncertain（不確定），搞到連何君堯都忍唔住出聲。之前，有人因為BNO問題去國際申訴，如果呢班人真係咁有勇氣，點解唔敢去批評英國政府？點解唔學喺香港咁，上街抗議，而家反而鬧好心嘅何君堯呢？崇洋唔緊要，但唔好「崇到連自尊都不要」！