文/稀思路
筆者成日強調，黑暴運動係一場打砸搶燒嘅破壞活動，而其所謂「同路人」，亦係一班各懷鬼胎嘅搞事者，運動個勢強時，呢班人話自己「不分化」、「齊上齊落」，暴力行動失敗各自飛之餘，對於所謂「同路人」嘅支持，當然亦會越來越少。最近，由國安逃犯羅冠聰成立嘅「香港協會（The Hong Kong Umbrella Community, HKUC）」喺英國申請解散，羅冠聰話係資源同組織營運原因，筆者簡單啲總結，其實就係無錢！
呢個「香港協會」嘅社交平台，喺接近兩年前開始就冇更新，儼如一個殭屍組織，最近申請取消註冊，正式想解散，都係意料之內嘅事；不過，羅冠聰就講得非常好聽，聲稱協會成立以舉辦文化同社區活動為主，但因為核心成員到英國後慢慢各自發展，幾年來都係化整為零推進文化活動。「協會」另一董事王惠芬就直接啲，講明解散主要因籌款困難，但就強調解散與特區政府通緝羅冠聰並無關係。
根據羅冠聰嘅講法，「協會」資源主要來自申請非政府資助及市民捐贈，表示自己唔清楚佢被香港特區政府「針對」會唔會影響申請資助，但佢就話會繼續個人嘅政治倡議。筆者先想講講，美國總統特朗普上台，大刀闊斧減資助，包括對一啲反華組織資助，呢段日子除咗羅冠聰嘅組織，連香港的民主黨都打算解散，佢哋組織嘅解散，其實同美國開始喺全球範圍閂水喉，到底會唔會有關係呢？筆者真係好想知。
另一問題，就係羅冠聰嘅組織解散，同佢個人被香港通緝有冇關係？筆者覺得，一定有！好明顯，羅冠聰以至其「協會」，都係反中亂港組織，而羅冠聰本人又係國安通緝犯，如果金錢上同羅冠聰有來往，而被視為資助香港國安法逃犯，分分鐘會有刑責上身；喺呢個環境下，除非有人想「申請」犯法，否則就算係羅冠聰嘅家人，都唔應該同佢有金錢來往。
講返羅冠聰嘅「香港協會」，2021年年底喺英國成立，曾經舉辦過所謂「香港電影節」，但放映嘅電影係黑暴電影《時X革命》等等，之後有舉辦過「香港三月文化節」；其實羅冠聰所宣傳嘅「香港文化」，就係反政府嘅黑暴文化，如果開始連移英港人都唔多理，都係佐證羅冠聰等人，喺英國等地方開始冇市場、冇人理。
對於「香港協會」嘅解散，其實連登討論區嘅人，雖然都係偏向反政府，但就有網民講得相當直接，有網民指「美國又cut budget黃絲又唔肯捐錢」，亦有網民指「同類型組織已經幾十個 個個都食同一條水」，甚至有留言指「冇人捐錢 證明世上再冇黃絲了」。筆者咁睇，「黃絲」、移英「黃絲」一直存在，但佢哋都無必要養羅冠聰呢類政客一世嘅，更何況，好多移英「黃絲」去到英國，自己同家人嘅生活質素都直線下降，應該唔會自己食粥水，仲要捐錢畀羅冠聰去食高級西餐呀？
收藏
取消收藏
分享
