文/稀思路
黑暴以全面失敗告終，唔少參與黑暴嘅攬炒派，坐獄嘅坐獄，走佬嘅走佬，呢股「走佬風氣」，亦帶動咗一班盲目反對特區政府嘅人「一起走」，但走咗係咪就好呢？梗係唔係啦，走佬去英國、已執笠嘅童裝連鎖店Chickeeduck老闆周小龍，就喺社交平台展示自己如何「家徒四壁」，一張單人床、一張凳仔就係一個屋企，甚至連供車都冇錢。當初意氣風發反政府嘅人，移居英國後「沒有最折墮，只有更折墮」，筆者最近睇新聞，原來依家興英國人移民去愛爾蘭，咁玩法，移英黃絲係咪都可能要再搬家？
一直以來，無論生活幾困苦，至少部分移英黃絲喺社交平台，都好努力地扮演「一切生活如常」，但係英國本土民眾就清醒得多，原來自從英國脫歐後，英國民眾要到歐洲其他地方旅遊、工作或者置業都係處處受限，《金融時報》就報道，英國公民去年申請愛爾蘭公民身份人數，創下脫歐以來新高，有移民律師就話，眼見英國經濟前景黯淡、稅收可能加辣，越來越多英國人諗計，要攞返個歐盟成員國公民身份，愛爾蘭就成為咗理想出走地。
原來，愛爾蘭有個叫FBR嘅制度，即係海外出生入籍制，畀喺愛爾蘭以外出生、祖父母或父母任何一人為愛爾蘭公民嘅其他國家公民入籍，單單係舊年，英國公民就錄得逾2.3萬宗愛爾蘭FBR申請，係2013年以來最高數字。而愛爾蘭舊年收到嘅FBR申請， 英國公民又佔過半。喺外界認知入面，或者會覺得英國比愛爾蘭發達，依家反而係英國人要移民去愛爾蘭，代表咗啲咩？
移英黃絲可以因為面子或者所謂政治立場而欺騙自己，但英國人唔需要咁做，正如知名桌球手奧蘇利雲都移民香港，證明香港有吸引力一樣。根據英國移民律師嘅講法，其實英國，簡單嚟講就係冇未來！英國經濟對年青一代缺乏吸引力，因為財政問題，又預計退休人士會被徵收巨額稅款；而且，因為冇咗歐盟成員國身份，對英國民眾生活、旅遊、工作甚至置業都有影響，部分英國民眾唯有用腳投票，至少喺公民身份上同英國「說再見」。
之前，筆者一直強調一個觀點，就係移民應該係為自己同下一代有更好嘅生活，但一啲政治上腦嘅移英黃絲，就偏向虎山行，一家大細去到英國，發現自己原來移民係為咗「更差嘅生活」；周小龍喺香港時，至少仲係一個中產以上嘅富有階層，之前仲有閒情「偷食女下屬」，去到英國呢，屋企變成「家徒四壁」，鍾意車但又冇能力供車，最搞笑係話就算得一張凳仔，套戲都係咁好睇，「仲冇咁容易瞓着覺」，呢啲似係「精神勝利法」多啲喎！
港人移居英國，近年不同新聞層出不窮，例如筆者前排就寫過，有移英港人走去示威反對中國喺當地興建新使館，結果被英國警方強力對待仲拘捕埋；其他例子就有香港中產去到英國變低下階層，近日筆者仲睇到新聞，話英國嘅公共醫療服務質素每況愈下。有時唔係想踩低人移民去英國，但如果對待政治、對待生活以至移民問題，都訴諸感覺多於理性，自己捱苦就算，要下一代去一個歧視華人嘅地方成長，真係好咩？
收藏
取消收藏
分享
