文/稀思路
過去10年，Marvel（漫威）電影喺全球牽起一陣熱潮，龐大嘅製作、近乎真實嘅特效，睇到人嘆為觀止，當時喺中國市場，都引起咗好大迴響。中國製作嘅動畫、特效電影，係咪好難達到呢種高度？如果係幾年前問讀者呢個問題，可能讀者會覺得係，但近期《哪吒之魔童鬧海》（《哪吒2》）嘅上映同熱賣，正好告訴全世界，中國喺動畫、特效製作，一樣可以踏進世界頂峰，從前嘅電影世界係西方甚至係美國獨大，往後嘅電影市場，中國絕對有能力分一杯羹。
《哪吒2》走勢有幾強勁，最好都係讓數字說話，一套由中國人打造、充滿特效嘅動畫，自1月29日大年初一上映以來，唔夠一個月時間，累積票房至少已經衝破122億元人民幣，成為中國史上最賣座電影，仲打破咗《玩轉腦朋友2》（Inside Out 2）嘅紀錄，成為世界電影史上最賣座動畫！喺內地，全國上下都入場力撐《哪吒2》，累積入場人次超過2.5億人次，平均嚟計，就係每6個中國人，可能就有1個人入場睇過。
成功背後，往往係無數嘅血同汗，比起第一部《哪吒》，《哪吒2》嘅角色數量係第一部嘅3倍，全片超過1900個特效鏡頭，咁龐大嘅製作、高水準嘅動畫畫面，有130多家公司參與其中，入面近一半都係員工20人以下的公司；《哪吒2》嘅成功，係眾多中國公司的心血，亦係中國人眾志成城一大體現。
《哪吒2》入面每一個畫面，甚至係每一條畫線都係嘔心瀝血，製作過程無比艱辛，筆者睇導演餃子嘅訪問，其實製作團隊係搵過外國團隊參與製作，但可能因為對方唔夠重視中國動畫，或者基於文化差異，知名嘅外國團隊，可能只係搵團隊當中嘅非一流人員去製作特效鏡頭；收到嘅效果唔理想，中國團隊最後「自己的事自己做」，克服種種困難，製作出中國甚至世界動畫嘅天花板，一舉震驚世界。
筆者雖然唔係專攻動畫，但都算係一個電影迷，如果講到動畫，基本上以前就只會諗到美國嘅，由小時候睇嘅《獅子王》、《反斗奇兵》，到近年好受小朋友歡迎嘅《玩轉腦朋友》系列，多多少少都畀人印象，就係睇動畫同特效，特效要睇美國嘅，動畫連故事喺亞洲層面就睇日本嘅；但係，中國實力嘅提升，唔單止體現喺經濟、科技或製造，哪怕係遊戲（《黑神話：悟空》）以至動畫，中國都可以追趕西方甚至彎道超車，因為中國本身就係有強大基因，即使過去幾十年科技、發展較為落後，都可以一鼓勁追上來。
雖然香港仲未正式上映《哪吒2》，但動畫中哪吒從反抗命運到擊敗邪魔，「我命由我不由天」嘅精神，讀者們可以諗下，呢種精神亦係中國人嘅精神。過去百年，中國曾受盡列強欺凌，但今日中國，就係憑住「我命由我不由天」，14億人努力改變自己同國家嘅命運，當年睇唔起中國嘅國家，今日唔少都爭住同中國修補關係。從遊戲《黑神話：悟空》、人工智能大模型DeepSeek，再到《哪吒2》，邊個仲敢話中國科技、技術唔得？《哪吒2》導演餃子棄醫從畫，「啃老」3年，潛心創作，加上整個中國團隊嘅努力，換來撼動世界嘅傑作；或者到今日，仲有西方國家或者外國人會看輕中國人，但就如《哪吒2》，哪吒不怕海龍王，中國亦不怕貨比貨！
收藏
取消收藏
分享
