【點新聞報道】當初號稱不篤灰不割席不分化，現今已然露出真面目。有移英港人大爆英國港人移民圈的醜行，總之從舉報、無牌、偷稅、漏稅、上網唱衰、投訴、過橋抽板等等，可謂包羅萬有樣樣齊咁話。有網民直指，「對香港人最刻薄嘅永遠都係香港人，篤灰舉報互相批鬥好似為興趣，郁啲就要你入唔到籍，永不翻身！」
該名移英港人在fb群組「英國香港人生活交流區」發文，言語間充滿指責、嘲諷、批評的味道。他提到「已經累積咗好多香港人嘅新移民，未有BNO簽證前英國嘅香港人group得嗰幾十人，求都冇人入，到而家香港人Group隨隨便便一個都已經幾百人，嗰啲舊谷主自從人多左就變咗老細咁，唔鍾意邊個就踢邊個走，審核人入谷仲嚴過申請貸款，見到真係好滿足。」
不少移英港人會在當地創業，開餐廳，做裝修，做地產，開超市等等各行各業都有，不過就慘遭同路人篤灰唱衰。樓主舉例指，「有香港人去幫襯返香港人食碗麵，點知食得唔啱口味，就上網唱衰人哋話人哋水都冇杯俾你飲，叫其他香港人唔好去幫襯，真係好窩心；最感動係見某位網友去香港人新開嘅超市買嘢，唔知係買唔到啱心水定係價錢貴？上網唱衰人屈人地話老闆係藍絲叫大家唔好去幫襯」。
另有移英港人好心着雷劈，樓主指，「有位朋友啱啱到埗未搵到工，就幫吓啲朋友接機同搬屋，唔知係咩原因得罪咗個客，就上網唱衰人話人哋白牌車犯法要報警拉佢；有位老闆朋友，開咗餐廳10幾年，見香港人新移民過嚟求職，見佢唔識英文又搵唔到嘢做，咁就諗住請返香港人幫吓佢哋過度，點知係返工唔滿意或定係辛苦定乜嘢，話辭職唔做，但又要舉報餐廳老闆偷稅漏稅，係幾有幸福感」。
樓主又指有同路人恩將仇報，指「最齊心最有愛心係，舉報當初搵唔到屋租，去求老香港人業主租屋俾佢哋落腳，後來搵到屋可以搬走之後就咬住舊業主唔合法，間屋欄，冇報稅等等，就算明明當初講好一個協議都唔理，純粹係為舉報而舉報，總之搞到你一身蟻，咁就最開心，我已經聽過有成7單同類事件。」
另外，地產、車房、補習同裝修行業都無一幸免，樓主列舉事例指「裝個車cam係內地貨又話人哋係藍絲要唱衰人；搵唔到工幫朋友的仔女補下習又被批鬥帶埋香港嗰套教育過嚟；有個朋友有餘錢買間屋收租，又比谷友唱話人哋帶香港果套嘅地產霸權過嚟」
樓主更指裝修業就最多投訴，指「某公司見係客係香港人，老公方面又係足球谷友，成本價幫你攪間屋，做好咗又話唔啱心意，又要投訴又要回水，又要上網Google Review寫衰人，搞到人哋冇生意做就最開心，明明裝修嘅時候你日日係屋企係睇住人哋做又唔出聲，問你鍾意咩色？又話冇所謂，問你鍾意咩款？又話你話事。點知做咗出嚟又話睇到都『唔開心』，攪到你間屋low晒，仲因為裝修得唔好攪到你兩公婆要離婚，四周圍發文唱人地公司」。
樓主最後語重心長地表示，真心希望各位香港人對香港人手下留情，「網上公審人成本低但好傷人，尤其係對住啲小生意嘅香港人老闆，可以畀返條生路人地行，都係搵啖飯食吓啫，大家都係帶住一家大細離鄉別井，唔係下下要人跪低認錯，打爛人飯碗先安樂？」
收藏
取消收藏
分享
