【點新聞報道】黃翠如今日（9日）挺着孕肚，身穿粉紅色露肩裙出席宣傳活動。容光煥發的她笑言「全身只有肩膊最瘦」，又大讚Edwin（老公蕭正楠）對她照顧無微不至。
翠如不知上圍豐滿了多少，她說，「我冇度，我只係度過肚圍，依家已過90cm，好開心，我好鍾意對住塊鏡掀起件衫欣賞個肚，覺得好圓好搞笑。」對於有人問體重增加多少，她直言，「我最近唔想磅重，如果冇重到會好擔心，重得多，又會有自卑感，覺得自己真係好師奶，總之每次產檢，醫生話BB個尺碼好健康就得。」
翠如懷孕前對食物興趣不大，但自從懷孕後變得愛吃，「但係工作唔可以食太多，加上食太多澱粉質唔健康，我決定農曆新年後就放縱咁食，Edwin不停喺屋企煮嘢畀我食，佢都話我奄尖咗。我依家好鍾意食，又鍾意出街食飯，好想試唔同餐廳，同埋對食好有想法，尤其每次產檢完就會諗定食咩，一定會叫多過兩人分量。」對於二人體重，她指出「佢刻意減肥，我哋一齊磅重，每次佢都會話輕咗幾多，但我就重咗幾多，搞到我好唔開心。」
她透露現時偶然會抽筋，老公會為她按摩，她大讚老公對她照顧周到，「佢好好，又要出去做嘢，因為我哋冇工人姐姐，佢又要做晒所有家務同煮嘢畀我食。佢唔會呻辛苦，有日佢放我喺超市行，佢返屋企砌床，砌到隻手損晒，佢同我講『我今日真係太辛苦，可唔可以讚吓我？』我話『你真係好叻，不如下次我哋搵個師傅整，我哋一齊行超市。」
翠如未肯透露懷孕周數及預產期，她解釋長輩教導少講為妙，免給BB壓力。至於何時停工？她預計農曆新年後，屆時便可以放縱吃喝，而1月19日的無綫頒獎禮，她仍未決定是否出席，要問公司及看自己當時狀態。問到開刀還是自然分娩？她稱醫生指BB的頭偏大，故有機會開刀。
早前翠如在社交平台上載BB的粉紅色蝴蝶結鞋，不少網民推測她生女仔，她解釋「BB鞋係贈品，我一件BB衫都未買過，而且楊茜堯話有大袋BB衫畀我，我睇吓個數量有幾多再決定要買幾多。」被問到幾時公開BB性別，她表示「要問吓長輩意見，不過我哋未必會搞Baby Shower」，並坦言可能連大肚寫真也未必會找人拍攝，可能由兩口子自己操刀。
（點新聞特約記者陳惠芳報道）
收藏
取消收藏
分享
