文/稀思路
香港一直有班崇洋媚外嘅人，總係覺得外國什麼都好，要法治有法治，要自由有自由，甚至係無邊無界嘅自由。但外國邊有咁美好，例如香港2019年黑暴，英美等國嘅政客都發聲支持暴徒，但當暴動發生喺英國、美國，原來英美嘅強力打壓，香港嘅執法部門都「學唔嚟」。最近美國發生一件事，更話畀我哋知外國嘅所謂新聞自由，其實都只係幻覺，因為當涉及到美國嘅權貴以至快將上任總統嘅特朗普，那怕係攞過新聞獎嘅政治漫畫家，一樣被拒稿。新聞自由概念來自美西方，由美西方國家「宣告」新聞自由死亡，係咪好諷刺？
話說，曾獲新聞業界最高榮譽普立茲獎嘅政治漫畫家特爾內斯，就畫咗一幅報章老闆、大型電子商貿企業亞馬遜創辦人貝索斯等人向特朗普「卑躬屈膝」嘅漫畫，其實過往特爾內斯嘅政治漫畫都未試過被拒絕刊登嘅，但可能因為今次漫畫「牽連甚廣」，所以《華盛頓郵報》就拒絕發布有關漫畫，而特爾內斯就選擇辭職抗議，並批評《華盛頓郵報》因為自己筆下人物而撤稿嘅做法，將會損害新聞自由。
呢幅被撤稿嘅漫畫，特爾內斯之後就自己擺咗上網，畫面入面有幾位科企同傳媒大亨單膝跪地，向高高在上嘅特朗普塑像獻上金錢，除咗貝索斯，仲有Meta創辦人朱克伯格等；另外，仲有一隻代表迪士尼公司嘅米奇老鼠，事緣之前特朗普控告迪士尼旗下嘅美國廣播公司誹謗勝訴，美國廣播公司以1500萬美元與特朗普達成和解。一幅構圖簡單嘅政治漫畫，將美國富豪全部「跪倒」在特朗普面前嘅事實完美呈現出嚟，可見特爾內斯呢個攞過普立茲獎嘅政治漫畫家，功力有返咁上下。
成件事嘅起因同結果，相信讀者們不用思考太深，都會明白係咩一回事，不過，《華盛頓郵報》似乎就唔係好願意承認事實，佢哋嘅社論版編輯就發表聲明，話退稿決定並無惡意，因為該社論版剛好發布一個同漫畫主題相近嘅專欄，又計劃刊登另一個諷刺專欄，編輯部只係「避免稿件內容重複」啫。筆者睇法好簡單，如果一件事係社會熱話，理論上係同一份報紙，甚至同一個評論版面，出現唔止一篇評論係唔出奇嘅；再者，不同內容嘅發布時間可以調整，《華盛頓郵報》嘅講法，讀者們相唔相信？
其實，特爾內斯嘅漫畫，只係點出咗一個大家都知嘅事實，就係好多美國富豪、巨企，喺美國總統選舉前或時候，就選邊站喺特朗普嘅對面，點知特朗普依家真係勝出總統選舉，一班驚畀特朗普秋後算賬嘅富豪，或者係怕咗特朗普「拳頭」嘅人，都以不同形式包括捐錢想補鑊。呢啲事件，就算特爾內斯唔畫出嚟，所有人都看在眼內，《華盛頓郵報》拒稿諗住可以解決事件，點知特爾內斯辭職加自己公開幅漫畫，反而令幅漫畫更多人睇到，《華盛頓郵報》算係弄巧成拙喇。
喺美國憲法嘅第一修正案，明確地對國會做出限制以保障言論及新聞自由。新聞自由可以話係美國法治嘅基石之一，但事實證明，美國嘅媒體由富人所有，美國嘅富人又怯於政府，唔需要政府出手，美國一班富豪寧願抹煞新聞自由，都唔想得罪特朗普。如果事件發生喺香港，又會有一班反政府人士攞嚟大造文章，但發生喺美國以至英國？呢班人又唔會衝出嚟批評美國、英國。其實，當我哋話外國政府、政客係雙重標準嘅時候，一班支持美帝嘅人，一樣都係雙重標準，只看到外國好嘅，而且永遠忽略外國嘅問題。
收藏
取消收藏
分享
