【點新聞報道】有的士司機分享在尖沙咀一帶載「富婆」奇遇。稱婆婆攜同工人上車，一上車先用「垃圾袋」墊位，儘管有警員在後方捉違例停泊，司機再三催促，二人仍不緊不慢地上車。上車後又嫌車廂有煙味，司機借私夥香水闢味，亦被她嫌cheap。
該的士司機在Facebook群組「的士司機資訊網 Taxi」分享自己的載客奇遇。他發文指在尖沙咀五星級酒店一帶落客，現場有不少的士「塞死曬」，警察到場趕車疏導交通，捉違例停泊。這時婆婆上車，從車cam片看到，該婆婆一身白衣，襯一條紅色頸巾，一副太陽鏡架在頭上，打扮貴氣，她上車前先着外傭工人，打開一個白色垃圾袋墊在座位上。雖然現場已聽到警方開咪，四周汽車響咹聲亦四起，但該工人不為所動，仔細墊垃圾袋時，一絲不苟，安頓好後，婆婆才施施然上車。
的士司機擔心被抄牌，不時催促：「快少少，快少少。」這時婆婆卻非常淡定，她先提司機：「等埋個工人呀。」然後氣定神閒地說：「我係傷殘人士，警察唔會理。」但司機表示，仍有被抄牌的風險。工人這時從另一邊門上車，手上拿着一堆紙袋，估計為婆婆在尖東逛街的「戰利品」。司機不禁大呻「呢啲貴客真係唔該你下次搭Uber。就算俾你打，我都唔想俾差佬抄牌。」
的士司機帖文繼續分享乘容難頂行為，「又話部車有味俾支香水佢又話我cheap，又話自己用開幾萬蚊，真係好人難做。」在司機分享的第二段影片中可見，婆婆指車內有煙味，聞言司機亦好好態度想方法解決，司機向對方遞出一支香水，未料對方面露不屑且嫌棄「咁cheap我唔會用」，隨後稱「我枝XX香水，兩萬囉」。司機以為聽錯，問道：「幾多嘩？幾錢？」婆婆仍淡定地說：「兩萬。」司機即表示：「咁犀利！富婆嚟喎！」但婆婆即回應：「唔係犀利。」司機則表示：「我哋窮呀嘛！」影片至此結束。
帖文引來網民熱議，有網民認為該婆婆麻煩，「又要鋪個袋，驚死污糟咁，真係唔好出街」、「呢d扮嘢客」、「咁有錢有私人司機，洗搭的士咩」、「建議佢着潛水衣再笠個魚缸喺頭先出街。」亦有留言建議他們應該請私人司機，方便又衞生。不過，有部分網民則認為乘客未必是嫌車廂不衞生，或者是有苦衷，「我覺得佢係驚失禁，所以要鋪住嘢」、「認真，係有啲人自己知自己事，所以鋪膠袋，佢有公德心」、「鋪袋都係個客自備，你唔俾人哋係唔想自己條褲甩色，整污糟你張櫈？」
收藏
取消收藏
分享
