【點新聞報道】《中年好聲音3》昨晚（29日）8時30分翡翠台播映，新一回賽制，35位選手分為7組，按晉級次序從7首指定歌曲中選歌。每位評審最高可給每一組20分，另邊廂下一回合導師分組賽的3位導師谷婭溦、韋綺姍和謝文雅，在後台憑聲音盲選揀學員，每撳燈一次可為該團戰演出加1分，團戰最低分的3組，會共淘汰5人。
本回合最高分的劉洋隊，在分組後曾爆「失聲風波」，隊員趙浚承自揭吃過蛇羹後突然失聲，綵排時也未能唱歌，需由王鄭浚仁代唱。曾以男子組合Square出道的趙浚承謙稱「掹車邊」參賽：「心情好驚，我好鍾意唱歌，曾經出過道，之後離開做其他行業，放棄咗唱歌，覺得自己冇機會。同呢班人聚埋有共同喜好同愛好，好難得，我掹車邊跟住佢哋。」5人演繹《我的歌聲裏》贏盡全場拍掌聲，張佳添激讚：「你呢班人可以成團，好厲害！劉洋有一段發揮得非常之好，其餘四個都冇失色。」周國豐亦讚劉洋音樂感強。
屈居第二的黃博隊，周國豐大讚表現極佳：「唯一要扣分係去到music bridge之後，chorus部分個力量，黃博係有啲要負責，力量去唔到將首歌推進再上一層。」Eric Kwok反而被黃博的演技吸引：「黃博企喺後面嗰幕，我好鍾意，佢好有戲，成個表情話畀你知隻歌講乜、唱緊乜，身為歌手有戲好緊要。」5人得悉分數奪得88分好成績，即擁作一團感動流淚，羅逸軒感觸良多：「我哋5個係好內斂嘅人，開頭讓得好緊要，行前一步又退一步，好開心你哋睇到我哋當中嘅合作。」
（點新聞特約記者陳惠芳報道）
相關閱讀：
收藏
取消收藏
分享
稿件由上傳 · 文責自負 · 不代表本網立場
