【點新聞報道】呂爵安（Edan）在聖誕節推出他首次親自作曲的《純銀子彈》，歌曲MV更由他首次親自執導，一手一腳包辦整個新作品。
彈琴向來有一手的Edan，原來今次是首次作曲，他說：「一路講咗好耐，好想實現呢件事，前排有啲靈感，寫咗幾個chrous出嚟，send俾身邊人聽，大家聽完覺得幾好聽，唔錯，甚至花姐都話叫我以後唔好做幕前，唔好唱歌，做幕後啦，所以出首自己寫嘅歌，係一個幾得意嘅契機。」
除了親自作曲，Edan更首次執導MV，他說：「以往作品都有好高參與程度，俾好多意見，但真係自己由零開始參與，度好曬每一個shot，呢個真係第一次嘗試。」對於成為MV導演，Edan有很大感受，他分享道：「好大唔同係cut咗唔會返去化妝間休息。平時一嗌cut，就可以坐喺側邊㩒手機，但今次就要長期坐喺mon壇睇住。呢次MV由自己構思成個concept點拍，後期剪接自己都有參與。當然必須要有個團隊，好多謝佢哋幫我完成呢件事，因為自己一個人冇可能做到。」
Edan初次做導演始發現這個崗位有一定的難度，他說：「我可能腦海中覺得係咁樣，但原來喺現場係有好多限制。呢啲時候就會不斷question不斷懷疑。不過做導演好享受就係，自己可以參與到個作品，未知成果自己滿唔滿意，但過程一定有個滿足感喺度，同埋花姐尊敬咗我好多，係幾得意嘅一個體驗。」
（點新聞特約記者陳惠芳報道）
收藏
取消收藏
分享
