文/稀思路
喺上世紀90年代到千禧年代，盛產警匪片、江湖片，唔少電影充滿刀光劍影、槍戰連場，電影以至新聞，都畀當時年少嘅筆者感覺，「澳門真係好亂」，好似成日有槍殺、毆鬥事件等；今日，澳門正踏入回歸祖國25周年嘅大日子，25年過去，其他人睇到澳門經濟好咗好多，而一個同樣影響澳門市民生活嘅治安問題，其實亦大幅改善，當年大家睇到嘅係「濠江風雲」，已經演化為盛世濠江。
睇《澳門時報》幾年前嘅報道，回歸前澳門治安極差，例如喺1996年，就發生多宗縱火、街頭爆炸襲擊，甚至連澳門官員遇襲案件都有，包括總督府爆炸案、司警局附近發現子彈案，當年時任博彩監察暨協調司副司長布里路喺街上遭槍擊受傷等；到1998年，仍然發生多宗政府官員受襲案件。剩係計殺人案，就由1997年29宗、1998年39宗再升到1999年57宗；而綁架案1997年到1999年分別為9、13、25宗。
自2000年起，情況發生逆轉，治安狀況亦迅速好轉，殺人、搶劫、縱火、綁架、勒索案件都呈現下降趨勢，之後連續多年，殺人案件為個位數，甚至曾經降低到零案發，其他嚴重罪行數字都係下降。近日有澳門市民接受訪問，就指出90年代澳門治安混亂，槍擊、燒車、綁架事件等經常發生，唔少青年到香港、台灣以至內地珠三角搵工，自己當時喺澳門求職，好多簡歷都「石沉大海」。
安全同穩定，就係澳門發展嘅基礎，隨住澳門治安改善、開放賭權、重視福利，今日嘅澳門同回歸前相比，已經有翻天覆地嘅變化，一個治安差嘅賭城，變成世界級賭城；回歸時政府只有20億澳門元儲備，依家已經有超過6000億澳門元儲備，人均GDP排名世界第2，個人存款亦增長多倍。澳門回歸祖國，既象徵國家有力地支持澳門，亦意味回歸祖國，令澳門更強大、更堅壯。
國家主席習近平12月18日抵達澳門，將會出席慶祝澳門回歸祖國25周年大會暨澳門特別行政區第六屆政府就職典禮，並視察澳門。習近平主席表示，25年來，具有澳門特色的「一國兩制」實踐取得了舉世公認的成功，展現出勃勃生機和獨特魅力。國家的發展日新月異，勢不可擋。習近平主席又指，澳門是祖國的掌上明珠，他一直惦念着這裏的發展和全體居民的福祉。由此可見，澳門的發展，以至在中央心目中的地位，絕對舉足輕重。
國家好，特區好，香港嘅情況係咁，其實澳門都係一樣，有強大嘅祖國支持，先會有可以順利發展嘅特區，澳門嘅發展經驗話畀全世界知，「一國兩制」不單止成功實踐，仲可以實現飛躍式進步；如果澳門、香港以至整個大灣區再加強合作，潛力更可能係全世界最強嘅灣區。喺澳門回歸祖國25周年嘅喜慶之日，我哋既替澳門高興，亦要思考喺未來，點樣同澳門加強合作，點樣連同其他大灣區城市，衝出世界，再創高峰，亦為國家發展，貢獻更多力量。
收藏
取消收藏
分享
