【點新聞報道】真人版「孖寶賽車」！一名車主日前於社交平台發帖及影片，指「邊諗過行行下前面都會有人放龜」。影片所見，車主向沿荃灣路往葵涌方向開車，駛至海之戀商場對開時，前方突然如「孖寶賽車」般放出道具，幸好車主反應快、即時躲開，避過意外發生。
該名車主在fb群組「車cam L」發文講述事件，指「似係前車冷氣機個頂蓋」，表示好在「架車生性」，又指後面的一輛七人車，因保持了安全距離所以冇事。
不少網民大讚車主好身手，「除咗好反應外唔知講乜好」、「堅啊師兄，反應快技術好，佩服」、「避到先勁」、「香港都有孖寶賽車」、「玩多啲mario，真係幫到手喎」、「中咗真係無仇報」。
有網民就問車主「都幾得意～俾人放完龜～仲甘有信心繼續keep住行右線」，車主回覆指，「片後已經減速墮後，keep住行因為驚魂未定同埋其實左線有架車上緊嚟」。
收藏
取消收藏
分享
