【點新聞報道】黑色喜劇《一個部門的誕生》由《樹大招風》《神探大戰》兩屆金像編劇麥天樞執導兼執筆，演員還邀得謝君豪（豪哥）及朱栢謙（朱謙）加入劇組演出，此次為兩人相隔14年再度合作。
二人受訪時透露今次同是受劇本打動演出，豪哥指：「麥天樞係一個好好嘅編劇，今次係佢第一次導演，一定要撐佢喇，劇本相當完整，感受到佢花咗好多心機去寫。開拍前都有開會，有了解導演同編劇嘅諗法。」朱謙則分享：「導演好有誠意，同演員有好多交流空間，所以一定要支持佢。導演了解完我哋嘅想法，又會再調整劇本，感受到佢對演員嘅重視。」
被問到二人的角色關係，豪哥透露：「今次我飾演電視台老闆，朱謙飾演電視台行政總監，即係佢幫我打工，我又會讚佢又會責備佢。至於係咪真心，大家就要自己參透。」朱謙補充：「電影風格係黑色幽默，所以不按常理出牌㗎。」豪哥笑言：「以我理解，黑色幽默係唔可以胡鬧，係認真到好極致嘅時候就會幾好笑，就會出咗嗰份味道。」至於被問到今次有否「爆肚」演出？豪哥笑指：「導演可以容許，佢冇限制我哋點做，如果有靈感可以同佢分享。」
豪哥及朱謙屈指一算，兩人已經是相隔14年再度合作，豪哥大爆自己是朱謙的「樂迷」：「雖然隔咗14年先再次合作，其實我一直都睇佢做戲，聽佢唱音樂劇。仲記得2010年嗰陣合作《情話紫釵》，朱謙每次唱音樂劇，我都會去台側欣賞，真係聽出耳油，好有感染力。」而朱謙則表示豪哥對後輩滿滿關心：「豪哥係我嘅偶像同榜樣，佢真係有睇我嘅戲，就算有時喺街撞到，佢真係會講得出我做緊啲咩。好多謝佢嘅指點同對後輩嘅愛。」
聖誕節即將來臨，豪哥表示會在工作中渡過：「我會為《天下第一樓》到幾個城市深圳、佛山、蘇州、北京、上海進行接近20場巡迴演出，緊接農曆新年前再返香港演出，就收爐過年。每到一個城市就要好快入台演出，即將要投入舟車勞頓嘅節奏。」
（點新聞特約記者陳惠芳報道）
收藏
取消收藏
分享
