文/稀思路
喺一啲偏向支持攬炒派嘅人士當中，一直流傳住一個傳說，就係香港呢樣唔好、嗰樣又唔好，唔夠「自由」、「開放」等等，於是，幾年前就興起咗陣移民潮，而英國更成為佢哋心目中嘅「首選」。不過，傳說歸傳說，理想很美好，現實很殘酷，有錢人去到邊都係天堂，一般人要移居外國重新開始，生活好唔好真係好講運氣，最近就有人網上發文，話自己移居英國後生活質素大減，講到非常壓抑，筆者睇到嘅反應好簡單，條路自己揀，有咩好抱怨？
呢則喺連登上載題目為「窮L移英有感」嘅發文，主角梗係呻窮、呻慘啦，佢話自己喺香港時人工唔錯，工作壓力少，消費又「10分開心」，而家身處英國，更直頭係深深體會到呢個事實；當佢喺工廠攞起一件要幾百鎊嘅衫，而自己收緊最低工資12鎊（每小時）時，反差都幾誇張。
一路講，一路講，發文者基本上就係「一路呻慘」，講到自己以前喺香港，幾百蚊食餐自助餐唔需要點考慮，去日本旅行唔覺得貴，最誇張就係喺淘寶購物。發文者講嘅，主要係講緊生活質素嘅對比，筆者估計佢以前喺香港生活唔錯，移居英國後直接變咗「低等工人」，收最低工資，食咩？唔知？住邊？都唔知，但肯定唔係好；見到發文者咁慘慘豬，但部分網民似乎就唔係好同情，有網民串佢「無錢又無牌學咩人移民」，又有人話冇錢冇技術「只係去做難民，唔係移民」，甚至有人串佢「鬼叫你細個唔認真讀書，不自量力，見人移英你又移」。
其實「要離開香港，要移民英國」，一直就係偏向反政府一班人嘅一個故事或者傳說，呢個講法嘅前提係香港唔好，外國更好，但係當一個又一個例子擺在眼前，故事只係故事，不代表事實，事實係香港始終最好，正常人後生仔就算買唔起樓，都食得起自助餐同去到日本；而家發文者喺度呻，連黃絲集中營嘅網友都唔支持佢，筆者講得好聽啲，會話條路自己揀，實則呢……係抵死。
發文者嘅文章，仲有一段耐人尋味嘅說話，講自己分享「都係想留喺香港嘅朋友們都唔好忘記你哋美麗嘅生活背後，係有班人付出咗代價，而家我喺英國其實都只係體會到佢哋一半都冇嘅苦」，言下之意，係講緊黑暴？定係其他意思？香港美麗生活背後，源於香港有中央同特區政府止暴制亂先真呀，唔該發文者認清事實！
如果香港曾經唔好，係因為有人用暴力破壞香港，搞咗黑暴出嚟，筆者唔知發文者係咪參與者之一；但不論是與否，選擇相信攬炒派政客嘅思想，或者選擇相信「移居英國會更好」，錯信一啲故事或者傳說，咁自己要找數，都係合情合理，發文者可以繼續在工廠，「好好加油」。
收藏
取消收藏
分享
