【點新聞報道】開車前，務必關閉所有車門，確保乘客安全。有港男日前晚上搭乘的士時，遇上驚險一幕，其座位旁車門於行駛時一直未有關上，他主動提醒司機，但對方「唔停車，淨係喺度撳嗰粒掣」，故拍片分享事件。
該港男在社交平台threads發帖表示，自己開始揸車後，已甚少搭的士，「跟住一搭的士就咁刺激，車門都唔使閂」。從其上傳影片可見，當晚他坐於的士後座，的士正於馬路上行駛，惟後座左邊車門未有關上。樓主於是動提醒司機，但對方不願停車，「最慘係咩，叫住佢仲行緊，叫咗佢幾次，佢淨係喺度撳掣，唔停車」，所以才拍片分享事件。
有網民質疑「個司機冇留意到未閂門咩？」樓主回覆指「冇，如果我冇同佢講，佢真係諗住咁樣車到我返屋企」；有網民則認為「咁你可以選擇落車，係你仲有得選擇嘅時候...」，樓主無奈地回應「一上車就咁樣，唔通跳車」。
另有網民搞笑留言「開門跑車」、「豪華版泰國篤篤模擬器」、「冷氣都唔洗開」、「沿途望出車外 是命喪的感慨」、「方便落車，又方便逃單⋯」、「最緊要係扣好安全帶，綁定好物件！」。
有網民質疑司機涉嫌危險駕駛，「有啲真係懵X嚟，一上車就篤油，睇都唔X睇閂咗門未」，「我記憶中豐田個自動門有限速度，但我唔記得咗幾多，好似20（時速20公里）？佢起步車速太快，一啖油就過咗20，之後佢㩒極閂門掣都會無反應，佢要收返慢架車，再㩒佢先會有反應閂門」。
收藏
取消收藏
分享
