【點新聞報道】提到英國不少人都會聯想到「美食沙漠」，有移英港人日前在社交平台發文，數落身邊的當地同事一成不變的習慣，更連跳出「舒適圈」的勇氣都無，只肯食佢認知的食物。不過，網民反嘲有錢點會唔識食好西，「窮手足打份牛工同窮鬼工友一齊」、「下下都扮代表扮專家出結論」。
該名移英港人在一個移英港人群組發帖，數落其英國同事，指「英國人對嘗試新食的態度真係唔似香港人，香港人最愛試新嘢，唔好食／唔鍾意最多無下次」。樓主提到兩名同事，「同事A每日午餐食一小盒好似貓罐頭嘅即食意粉，入職半年，每日如是；同事B就每日帶一包Ben’s rice及一罐吞拿魚，撈埋叮熱就食，每日如是」。
樓主還暗嘲同事大鄉里，「上星期食晏叫同事A一齊去買老麥，我用經理畀嘅Coupon買魚柳包，將另一張Coupon畀同事A，佢同樣地買魚柳包。食完之後，同事A話第一次食魚柳包（佢差不多37歲），多謝我介紹畀佢食。」
另外，即使樓主落力推介或送上食物都無人吼，「我經理又係好怕試新嘢，介紹佢食一間bakery嘅Apple Turnover，佢say no；帶日式飯團返公司畀佢試，佢say no，只肯食佢認知嘅食物。」最後，樓主得出的結論是「所以英國係美食沙漠唔係無原因，因為大部人都唔願意嘗試新食物。」
不過，網民反嘲有錢點會唔識食好西，「窮手足打份牛工同窮鬼工友一齊，就了解到整個民族可以做專家了！典型香港代表隊！」、「佢做邊行，咩職位？如果我搵得少，我都會日日食罐頭，唔會充大頭」、「典型香港『窮鄉里』，下下都扮代表扮專家出結論」。
收藏
取消收藏
分享
