【點新聞報道】不少港人愛「一盅兩件」飲杯茶、食件點心。有網民近日光顧長沙灣一間點心店，外賣5款點心，承惠115元。豈料，回家打開一看，方知中伏，居然「一塊蘿蔔糕切成四小塊當四件」，樓主嬲爆揚言「無下次」。不少網民均認為店家將蘿蔔糕「一開四」的手法有問題。
該網民在fb群組「飲食黑店大全 (全港食店質素/價錢/服務關注組)」發文，怒轟長沙灣一間點心店，表示懷疑中了打手廣告帖的伏，指自己光顧該點心店買外賣，從其上載的賬單可見，點了五款點心，包括海苔鮮蝦餃(兩粒)18元、鰹魚鮮肉燒賣(兩粒)16元、原籠雙色馬拉糕28元、七彩鮮蝦腐皮卷(兩件)22元及百花煎釀蘿蔔糕(四件)21元，另加5個外賣盒10元。
當樓主回家打開一看，發現點心份量及質素不似預期，「一塊蘿蔔糕切成四小塊當四件，燒賣、蝦餃每份二粒各放一個盒，又可以收多四蚊外賣盒費，如圖咁多樣收$115」。樓主嬲爆直言「真係多L謝！無下次byebye」。
帖文引起網民熱議，對於蘿蔔糕「一開四」的手法，「單價唔貴，但成品就離譜d，遲早完！」、「目測賣相一般，點心都好貴吓~酒樓價！蘿白糕先離譜喎？仲要呃膠盒錢?~似黑店多D~」、「蘿蔔糕4件真係笑咗」、「蘿白糕下次1開8會唔會覺得抵啲」、「明碼實價就啱嘅。不過件蘿蔔糕就真係講唔通喎，擺明將一件蘿蔔糕開四，咁就叫四件，你覺得咁都係正常？」
至於外賣盒收費方面，有網民認為，「淨係盒都收10蚊...名正言順（搶錢）」、「蝦餃同燒賣雖然係朋友，但未必可以共處一室，食店係冇錯，千錯萬錯都係客人錯」、「冇收袋錢，豪咗比你啦」。
不過，有網民則表示，「呢個係百花煎釀蘿蔔糕，好野來喎收$21差唔多啦，點心要分開膠盒是高級做法，唔介意放埋一齊要落單時講」。
收藏
取消收藏
分享
