文/稀思路
筆者成日寫文，分析攬炒派/反對派種種「膠人膠事」，佢哋有一種特質筆者比較少寫嘅，就係佢哋「善於內鬥」，例如喺新時代之前，佢哋最鍾意就係「激進嘅批溫和嘅」、「溫和嘅又回擊激進嘅」，進化到後來，就變成「和勇之爭」，喺黑暴前後，更加出現咗唔同嘅利益衝突，例如批評有人借黑暴呃錢，被指呃錢嘅就擺出一副「我都為咗民主運動」嘅姿態，其他類型就包括指某某人變質等等。最近，喺傳媒面前少有露面嘅民主黨前主席劉慧卿，就成為咗故事主角，發生乜事？就係因為佢帶隊參觀國家安全展覽廳。
話說，劉慧卿日前就同啲「徒弟」同青年朋友，到香港歷史博物館參觀國家安全展覽廳，之後喺社交平台貼出照片，豈料引來一場罵戰，佢畀人質疑已經改變立場，而佢嘅黨友李永達，就出面支持劉慧卿；之後，劉慧卿向傳媒表示，自己喺參觀過程有向「徒弟」同青年朋友講解因為香港國安法而定罪、還押同監禁嘅人嘅詳情，仲話自己「保皇黨搞嘅論壇我都會去，因為所有立場同諗法都要聽」。
對於劉慧卿嘅做法，有網民就讚劉慧卿「兼聽則明」，筆者嘅個人視角，反而睇到一件事，就係攬炒派嘅支持者真係「夠惡」，呢班人成日講自由同民主，講到大家應該點樣自由地行動同表達意見，如果社會係自由嘅，點解其他人唔可以去參觀國家安全展覽廳？點解劉慧卿去自己有興趣去嘅地方，就係「變質」、「叛變」同「改變立場」？
筆者一直都唔係亦冇可能係劉慧卿等人嘅支持者，但有一件事筆者係支持嘅，就係就算有人嘅立場偏向反政府，筆者都鼓勵佢哋睇多啲正確而有益嘅資訊；之前香港之所以咁亂，就係有人連「一國兩制」係咩都未搞清楚，基本法講嘅普選係咩亦唔去研究，一味聽啲政客講去衝、去犯法。筆者唔知劉慧卿喺睇展覽期間同佢啲「徒弟」講啲咩，但即使立場不同，筆者都建議各方人士可以去睇下國家安全展覽廳，了解下點解國家安全咁重要，必須努力維護。
不過，講到劉慧卿，筆者仲留意到佢話展覽中講述英國嘅影片「欠公道」，因為佢覺得英國為香港留下唔少「值得欣賞」嘅地方，例如自由、法治同公屋等；筆者唔係要否定劉慧卿，但英國殖民管治下嘅香港，點解出現法治同公屋，而唔係貪污猖獗？睇返上世紀六、七十年代嘅歷史，無論係成立廉政公署定係興建公屋，其實英國要做嘅，就係方便自己管治，佢哋到八十年代都仲想繼續管治香港；如果英國真係為香港好，講到咁偉大，點解要香港交軍費？點解港督唔係香港市民「一人一票」選出嚟？
其實，劉慧卿同其他攬炒派一樣，都有非常強嘅崇洋心理，什麼都是美國好、英國好，英國留下嘅「都是好的」；嗱，如果劉慧卿鍾意帶人參觀，筆者建議佢可以搞個英國團，去英國睇下人哋點樣反移民，點樣「打砸搶燒」。老實講，依家西方國家管治千瘡百孔，再盲目相信佢哋嗰套「民主萬能論」，只怕一個地方最後會「什麼都不能」。
收藏
取消收藏
分享
