文/稀思路
曾經有段時間，「剃人頭者，人亦剃其頭」呢句說話深深地刻入筆者腦海中，有人如果做壞事，或者支持其他人做壞事，壞事最終係會降臨喺自己身上嘅；好似美國咁，香港發生黑暴運動，美國竟然有政客形容為一道「美麗的風景線」，結果，呢道「美麗的風景線」就出現喺美國國會山莊，除咗暴動，仲死人添！當年支持香港黑暴嘅，仲有英國政客，今日佢哋點樣畀人「剃頭」？近日出現喺英國各地嘅暴動，應該就係答案喇！
話說，英國連日來爆發極右反移民騷亂，難民同穆斯林都成為被襲擊目標，其中喺羅瑟勒姆，周日（4日）仲有示威者攻擊收容難民嘅酒店，幾百人包圍酒店，向在場警員投擲雜物，打爛啲窗，縱火燒嘢，高叫「將難民趕出去」，甚至一度衝入酒店，據悉酒店內部亦起火，英國警方狠批示威者行為「令人作嘔」，首相斯塔默仲發出嚴厲警告，表示示威者將會受到法律嚴厲制裁，揚言「我保證你們將後悔參與騷亂，無論是直接參與還是在網上煽動，然後逃之夭夭。」
不斷發生騷亂，唔係無緣無故嘅，7月29日，默西塞德郡紹斯波特就發生咗一宗持刀襲擊案，造成3名兒童死亡及10人受傷，網上流傳疑兇係激進穆斯林移民，於是就揭起咗反移民、反穆斯林示威抗議；不過，依家西方國家示威抗議嘅「基本盤」，梗係唔止遊行、叫口號啦，連日示威明顯變成暴動，甚至有人向首相府同前首相邱吉爾雕像投擲燃燒彈同煙花等等，亦有穆斯林收到強姦同死亡恐嚇，一個合理嘅估計，就係英國嘅反移民浪潮越演越烈，甚至反移民目標會包括「其他移民」。
客觀地分析事件，筆者首先諗到嘅，係到英國政府被「剃頭」喇，之前支持香港黑暴時，唔係好「正義」嘅咩？近年英國罷工罷市，依家又到反移民浪潮，英國政府點解唔同示威者坐低傾？點解唔答應示威者訴求？點解要拘捕示威者？講真，部分行為如暴動、縱火，放諸四海皆違法，英美等國家之前大力支持黑暴，到自己地方發生暴動就更嚴厲打壓，明顯已超過「雙重標準」。
其實喺英國，讀者們唔好忘記，依家係有好多香港黃絲移民咗過去，佢哋喺香港咁鍾意支持反政府活動，筆者好奇，佢哋幾多人今次有參與其中？點解冇「玩埋一份」？呢度，係有兩個原因，第一，佢哋「扮惡」其實只限於香港範圍，離開香港去到其他地方，佢哋係喺下靶位嘅「二等公民」；第二，英國今次示威浪潮係反移民，唔好話企出嚟，佢地分分鐘就係下一個「被襲擊目標」。
早兩日，筆者上網睇到個帖文，有香港移民喺英國被襲擊，筆者驗證唔到當中真偽，但理性分析，英國部分人依家起勢反移民，搞埋香港移民真係一啲都唔出奇。英國政府依家應該深刻明白到，主流民意開始傾向反移民，如果穆斯林要驅趕，其他地方嘅移民或難民又點呢？再發展落去，香港移民又如何？一個國家，人口政策同移民政策隨時都可以改，一啲搬晒成副身家去英國嘅香港人，前途如何，尚未可知！
收藏
取消收藏
分享
