文/稀思路
近日，羅冠聰社交媒體Facebook有一段「道歉啟示」，道歉？乜攬炒派、反對派政客識得道歉嘅咩？真的，不過羅冠聰道歉，係因為佢支持或者恭喜過奧運女子重劍金牌得主、香港運動員江旻憓，原因？係因為江旻憓立場親建制、反「佔中」；筆者覺得，羅冠聰呢班人真搞笑，明明上屆奧運，有運動員「黑衫」作賽，反對派班人仲話人將政治滲入體育，依家一班「黃人」人身攻擊江旻憓，唔係將政治滲入體育咩？又玩今日的我打倒昨日的我？
講故仔，我哋要將條時間線拉長少少，上屆奧運，有運動員因為隊衣贊助問題，於是自己着咗一件黑色運動衫比賽，繼而受到質疑，質疑佢嘅人，受到鋪天蓋地嘅攻擊，大意就係，「唔好搞到運動員」，「黃人」義正詞嚴嘅姿態，真係「型」到呢……好喇，幾年時間過去，江旻憓爭氣到一個位，係為香港取得今屆奧運第一面金牌，啲「黃人」攻擊佢，擺明就係用政治立場去人身攻擊運動員啦！
羅冠聰先支持、再回收，繼而道歉，其實佢知唔知自己做緊咩？一個運動員，為港作賽，替港爭光，背後付出嘅心血，鮮為人知，個金牌有血有汗有淚，而且江旻憓並唔係只係為自己而戰，而係為香港而戰，羅冠聰如果咁鍾意道歉，點解唔為自己之前聯同其他政客破壞香港而道歉？水就抽完，依家要驚，反而要向返「黃人」道歉，羅冠聰會唔會一陣又再道歉，覺得自己怪錯好人（江旻憓）？
唔同嘅人，可以有唔同嘅立場，包括江旻憓，近日外界不斷針對江旻憓立場、言行包括反「佔中」而攻擊佢，筆者想問一個根本少少嘅問題，江旻憓有冇講錯、寫錯嘢？反「佔中」或者認為「佔中」禍害極大，有冇講錯？
非法「佔中」嘅本質，真係在於用違法手段威脅政府，而且過程中，反對派（後來進化成攬炒派）的確係強調「兩制」多於「一國」，更令人擔憂嘅係，因為非法「佔中」，一班反政府嘅政客的確係喺香港打開咗「違法的盒子」，2016年有旺角暴動，2019年有黑暴運動，江旻憓如指出「佔中」禍害極大，遺禍深遠，佢有邊一句講嘅唔係真話？
一班反政府政客、「黃人」，成人話要講道理、講法理，江旻憓講嘅唔係道理、法理咩？筆者深深明白，反對派只懂反對，那怕是真心話，佢哋一句都容不下，但筆者請你哋諗清楚，當初表明要用犯法手段威迫政府嘅，係你哋；犯完法唔想找數、唔認罪嘅，都係你哋；黑暴運動時表明要「攬炒」嘅，都係你哋，批評你哋嘅正義聲音唔少，江旻憓最多只係其中之一，難道運動員唔可以講真話，運動員就唔可以反暴力？
近日，好多媒體、KOL開Post（網上發帖），對江旻憓進行公審，當中不乏極為難聽嘅說話，但筆者睇嚟睇去，都係攻擊多於講道理；江旻憓在奧運場上出盡全力作賽，好不容易為香港攞到一面金牌，在私人或者學習領域，佢就點出違法行為對香港嘅損害，到底邊個係真正愛香港，邊個係害香港，道理真係太明顯！當唔少人喺度攻擊江旻憓嘅時候，不如大家擺事實，講道理，江旻憓邊句講錯，要知道江旻憓講嘅嘢，其實部分係反對派當年自己都承認，公開講過的！時移勢易，但真理不變，諸如羅冠聰之流，請你少抽水，或者攞多啲勇氣出嚟，回港自首！
收藏
取消收藏
分享
