文/稀思路
上回提到，有啲人「無論如何」都支持西式民主，因為無論某西方國家嘅領袖點樣唔掂，佢哋嘅選民，幾年後都有權利用選票選過第二個，好喇好喇，唔同你哋拗，但係呢種理論係咪真呢？筆者上回文章就講過，美國呢幾年越玩越爛，今年又到美國總統選舉年，行出嚟嘅兩個候選人，一個係「無為」拜登，一個係「破壞」特朗普，咁美國嘅選民，即係有得揀，定冇得揀？上周四，特朗普同拜登第一場對決，第一場就「火」，因為拜登完全「死火」，最搞笑係原來拜登唔退選，基本上係冇佢辦法，美國民主「優質」？「憂質」就真！
嗱，如果話有特定立場嘅傳媒批評拜登唔夠公道，咁立場較親民主黨嘅《紐約時報》，就喺二人辯論隔日發表社論，指拜登想服務美國嘅話，就應該「宣布退選」，畀民主黨可以即刻搵人遞補。點解要拜登宣布退選咁嚴重？因為拜登同特朗普辯論時，經常表再現得茫然或鬆懈，又用嘶啞嘅聲音發表拐彎抹角嘅答案；辯論之後，特朗普同其他共和黨人，就已經好興奮咁質疑拜登適唔適合擔任公職，即係，拜登已經成為咗民主黨嘅「罩門」，畀以特朗普為首嘅共和黨「狂攻」。
老老實實，拜登表現震驚全國，但筆者覺得一樣震驚嘅，係美國民主黨部分人嘅反應，例如拜登有盟友，呢幾日就喺度玩淡化，稱拜登只係準備不周、精疲力盡、身體不適等等，據講，民主黨內大佬，包括前總統奧巴馬、克林頓，都依然支持拜登；一個簡單假設，就係如果拜登唔退選，而黨內大佬又繼續支持佢，佢可能依然係同特朗普終極對決嘅民主黨人。
筆者睇資料，其實根據民主黨內部依家選出總統候選人嘅方式，拜登係排在首位，而且佢仲係現任美國總統，其實冇人迫到佢退選，除非，拜登喺8月嘅民主黨代表大會，未能夠攞到過半數嘅代表票數，咁民主黨先要開協調會，協調出新候選人，無論係拜登定係「唔係拜登」，都不利於民主黨。之前筆者睇過分析，仲話如果拜登一退選，民主黨會立即陷入「百花齊放」（混亂）嘅局面。
特朗普定係拜登？呢個其實唔係筆者關心嘅問題，筆者想強調嘅，係美國式民主，大大聲聲嘅民主制，原來過去幾年先畀特朗普玩爛，之後拜登上台「唔知做過啲咩」，到依家再選，仲係特朗普或者拜登？睇完佢哋第一場辯論嘅新聞，仲離譜，拜登接近「神智不清」嘅表現，原來都唔駛退選？咁講咩優質民主？講咩民主萬能論？客觀地睇，係一種「民主無能論」。
從美國政局，再睇全球局勢以至中美關係，筆者有一個唔好嘅感覺，就係美國內部都亂到一團糟，佢哋會點樣制定外交政策？如果最高領袖即係總統本身有問題，無論係特朗普定係拜登再做總統，筆者覺得佢哋都係「憑感覺」做事，同中國搞好關係對兩國以至全球嘅好處，佢哋未必會理性地諗；針對中國即係封埋自己後門，佢哋亦未必會諗。美國作為超級大國、精英大國，就到總統選舉，原來係咁樣畀選民做選擇嘅，筆者係咪要講句，「好羨慕美國嘅民主選舉制度呀」？！
收藏
取消收藏
分享
