【點新聞報道】無綫新劇《麻雀樂團》昨晚（12日）舉行煞科宴，劇中演員李佳芯、譚俊彥、郭柏妍及黃庭鋒等出席，當中李佳芯更否認拍拖。
李佳芯說該劇花了兩個半月便完成拍攝，也是她有史以來最快完成的劇集：「圍讀情況仍歷歷在目，眨吓眼就煞科嘞。今次好多溫情戲，有笑有淚，最難忘係圍埋拍打麻雀戲，所以大家一齊病，但唔拖慢進度，病住都繼續拍，希望出街時睇唔出我哋個病樣啦！」
佳芯開工期間一度病倒，更一下子瘦了10磅，她自己也被嚇倒。現在已比前飽滿，始終太瘦樣子精神。問及跟無綫傾續約進展如何？她坦言：「我剛拍完劇，現在才有時間傾。」問及她有什麼要求？她說：「我要求唔高，錢亦唔係最重要，我唔係需要好多物質生活嘅人，咁自己鍾意拍劇，有劇拍就開心。」
佳芯又指暫時會放假，做些自己喜歡的事情。談到早前冒着打風紅雨惡劣天氣，依然外出約會異性，佳芯否認拍拖，且謂：「原本係諗住打波，冇諗過打風，大家都只係朋友，因為我呢排學打網球，想做多啲運動，好想要番健康。唔好寫到我同人飲個咖啡，佢就係新歡，就算同女仔出街都可能寫到變咗性取向，但我會過番正常人嘅生活，會繼續朋友出嚟食飯傾偈！」
譚俊彥則透露，前晚穿絨西裝戲服，勁爆汗於灣仔疾走個多小時，完成《麻》劇最後一場戲後，便緊接趕往內地，出席即將開拍的電視電影《尋夢琴澳》記者會：「今次同陳展鵬、胡定欣及林夏薇等合作，我終於同定欣飾演一對。劇情會交代我哋一班人去到一個新嘅地方，點樣去適應，同埋介紹吓嗰個地方，輕輕鬆鬆咁囉。」
談到囡囡日前9歲生日，他表示：「劇組放咗我幾個鐘頭假，可以返去影吓相。我生日時許願，希望成日有工開，依家我個女生日我有工開，證明繼續有學費交啦。（囡囡冇投訴你太忙？）佢比較成熟，今年生日禮物係部掌上電腦，呢排佢有『新老竇』啦！暑假我們一家四口去馬來西亞出席一個活動，順便旅行吓。（首次成家人搵錢？）可以咁講，不過今次係同慈善有關嘅，都想小朋友接觸吓唔同嘅文化。」
（點新聞特約記者陳惠芳報道）
相關報道：
收藏
取消收藏
分享
