文/稀思路
筆者相信，大部分讀者都返過工，知道工作有工作嘅倫理，喺工作倫理中，最緊要係咩呢？最緊要就係忠誠！好簡單一個道理，如果一個人喺A公司工作，而B公司係競爭對手甚至係敵對嘅，而A公司竟然有人同B公司嘅人串通，讀者認為結果會點？輕則被解僱，如果嚴重例如泄露公司機密，可能會有法律後果；將相同道理放喺特區政府，特區政府有冇可能容許有人反政府、搞對抗或者支持黑暴？冇可能！所以特區政府最近更新《公務員守則》，筆者睇得好簡單，就係要進一步杜絕軟對抗，防止有公務員玩「拖後腿」，做得正確，值得支持。
公務員事務局今次頒布更新版《公務員守則》，即時生效，新增咗基本法第23條立法即係《維護國家安全條例》嘅相關內容，列明公務人員須為維護國家安全嘅工作，提供一切所需協助合理嘅便利、配合、支持同保障，仲要運用享有嘅一切權力同酌情權，以履行維護國家安全責任；另外，就包括要遵守相關資料嘅保密規定，如無合理權限，獲取、管有同披露受《維護國家安全條例》保護嘅國家秘密或官方資料，可以構成罪行。
社會都好關注嘅政治中立，相關原則繼續保留，而《守則》就講明「公務員不論本身的政治信念為何，履行公職時不得受本身的政治聯繫或政治信念所影響；公務員絕不能因為自己的政見而選擇性地拒絕、拖延或消極地執行他們個人未必認同的政府政策，或以任何其他方式致使他人對政府採取不信任或敵視的態度」。
筆者想先講講政治中立嘅問題，呢個概念經常被扭曲，甚至有人以為公務員政治中立，係連政府都唔幫，但呢個唔係事實，按照《守則》以及筆者嘅理解，公務員政治中立係執行指令或任務時，唔受到自己嘅政治聯繫或者政治立場所影響，好好咁執行政府內上級嘅指示；用常理去諗，如果公務員可以不忠於政府、不忠於職責，咁明顯係違反職場倫理，所以如果有公務員以「政治中立」之名搞軟對抗，肯定有問題。
其實，公務員要效忠特區、擁護基本法本來就係職責所在，公務員事務局更新《守則》，亦係隨住時代需要而更新。黑暴運動係過去咗，但軟對抗風氣仍在，筆者同讀者們回顧下，之前有立法會議員問過公務員參與黑暴嘅問題，政府就回覆涉嫌參與黑暴而被捕嘅公務員有89名，當中58名人員已離開政府，5名人員被法庭裁定罪成而將被紀律處分，其餘26名不獲警方起訴或獲判無罪嘅人員，則須接受部門內部調查。
可能因為筆者「記性好」，仲記得黑暴時一個典型例子，就係黃絲出身嘅顏武周，在學時已經參與反國教，佢畢業後加入政府，2019年時與另外幾名公務員發起香港史上首個公務員反政府集會，之後又籌組「新公務員工會」並出任主席，多次煽動公務員罷工及罷工「公投」等，甚至妨礙政府抗疫工作及反對香港國安法實施。顏武周最後離開咗政府，但呢個例子話畀社會知，即使喺政府內部，都唔一定政治安全。
坦白講，唔係筆者小心眼，而係筆者從生活、社交上嘅觀察，「公務員不等於忠於政府」係常識，就如一間公司，都總有啲人「一邊出糧一邊鬧公司」一樣，《公務員守則》可以阻嚇公務員唔好亂嚟，但未必可以令佢哋「黃變藍」；政府招聘公務員，好難徹底知道佢哋心入面諗乜，入職後嘅培訓同開導就變得好重要。政府嘅內部培訓已經比以前多咗唔少，筆者認為，教導公務員嘅重要性，絕不下於教導下一代及學生們，防微杜漸，至為重要！
收藏
取消收藏
分享
