【點新聞報道】影帝劉青雲與吳鎮宇相隔19年再度合作電影《談判專家》昨晚（6日）舉行首映禮，除一眾演員包括苗僑偉、栢天男、洪天明、周文健及黃又南等出席外，吳鎮宇兒子吳費曼（Feynman）及伍允龍等亦有到場支持。期間Feynman又主動跟青雲合照，爸爸吳鎮宇非常識做立即彈開，隨後青雲亦識做地叫鎮宇來張3人合照。近年電影以目標找數謝票，青雲直言不抗拒。
被問及對於票房可有信心？青雲笑言已盡力，但坦言票房很難預測，鎮宇則説：「套戲Feedback唔錯，希望Ok啦。」那會否多做謝票谷票房？他們表示要視乎時間安排，青雲更言示不抗拒：「有機會接觸吓觀眾都幾好。（依家盛行目標找數）係要咁樣㗎？我哋諗下先啦，哈哈！」
近年港產片票房口碑成績好，會否令他們增加個信心？鎮宇表示希望港片能繼續保持好水準：「大家要用心製作好電影，票房嘅嘢好難講，當然票房好返啲，大家會開心啲，拍得都會開心啲。」青雲指難預測票房。鎮宇在戲中角色動作場面不多，故不覺辛苦，反之青雲比他多。談到戲中演談判專家，問到現時談判技巧是否變高？他笑指對青雲的買餸講價技巧應該有提升，青雲則笑指已經很平。問鎮宇跟囝囝談判技巧有提升？他笑謂：「佢都費事同你傾偈，佢今日嚟主要搵劉青雲影相，佢至鍾意青雲。好崇拜！試過有次青雲拎唔到獎，仲傷心過我攞唔到，發晒脾氣，但冇乜理我。」青雲即笑指鎮宇相約他到家中吃飯是有目的。
提到古天樂的《九龍城寨之圍城》票房撼贏了《明日戰記》，青雲笑指兩部也是古天樂的：「梗係希望一部好過一部。」指對方付出很大努力，市道低迷時大家仍搏命去做，值得有好成績。問到可會自薦拍《九》片前傳？他笑謂：「唔使啦，呢啲動作嘢佢哋自己搞掂啦。」鎮宇即笑指：「有冇淨係講嘢角色？」另提到他近年頻頻北上拍電影及綜藝節目搵真銀，他笑指是「啱啱好夠食啦！」被青雲笑他很大食，鎮宇即笑指是囝囝很大食。
此外，謝票期間Moviemart代表更送上他們手繪海報給鎮宇和青雲，氹得他們非常高興! Moviemart更於6月8日起展出劉青雲x吳鎮宇小型作品回顧展, 回顧他們以往曾經合作過的電影同埋各自經典電影作品！作為兩位影帝fans, 萬勿錯過!
展覽詳情
日期：2024年6月8日-2024月6月30日
時間：平日1900-2100 六日假期1300-2000
地點：Moviemarks 荔枝角道169號
（點新聞特約記者陳惠芳報道）
相關報道：
收藏
取消收藏
分享
