文/稀思路
「騙徒手法，層出不窮」，「黃絲」斂財方法，當然亦千變萬化，如果讀者仲記得阮民安，印象最深刻嘅，應該就係佢因為煽動同洗黑錢入獄。最近，佢就公開表示自己移民英國，但如同其他「黃絲」頭目或黑暴分子，佢又點會單純話畀大家知自己去英國生活呢；喺講完一堆「感言」後，佢就留低一條眾籌、訂閱嘅連結，簡單嚟講即係「搵水」（叫人捐錢），但離奇嘅係，其中一個訂閱計劃，要500鎊一個月，即係成5000港元；講真，擺明掠水係一件事，掠到好似打劫咁，係咪過分咗？
根據依然存在嘅網上痕跡，呢個索價5000港元嘅訂閱計劃，叫「民安遊樂園同伴上路戰略夥伴」，剩係睇個名就感受到騙局味道甚濃，筆者三日前（5日）再睇阮民安Facebook，佢就話自己「錯要認！打要企定！」，果個要價5000元「最貴嘅Tier Plan」已經下架，並再次為引起大家嘅爭議而致歉，筆者睇個問題再簡單少少，佢去英國生活，點解要人「助養」佢呢？
如果讀者們上去佢嘅訂閱平台睇睇，可能會好奇，佢提供嘅內容有咩價值呢？例如「獨家好文分享」、「獨家生活照片分享」、「民安隊長最新音樂作品，MV率先發放」，我哋當佢真係有MV發布，但佢平時啲生活照片，都可以當錢賣？另外就係，佢話要用自己技能「照顧家人，照顧重病爸爸」，既然要用自己技能照顧家人，點解唔正正經經打工賺錢呢，真係奇怪。
阮民安話要照顧重病爸爸，筆者先唔去質疑佢，但佢自己喺Facebook講關於佢嘅Case，包括「關於金錢上面嘅陳述同指控」，然後又話有五個對象佢曾經幫佢哋尋求幫助，仲話會詳細解釋同分享，筆者諗法仲直接，如果籌咗錢用嚟幫人，點解有大約100萬元轉賬至賽馬會賬戶「作賭博」，阮民安如果敢答，問題好簡單，佢借「幫同路人」籌咗咁多錢，佢自己有冇挪用過當中一分錢？有就有，冇就冇，佢要解釋就直接答，如果佢有用，係咪包括用嚟賭波賭馬，則係第二個問題。
依家阮民安人在英國，就想同自己犯過嘅罪撇清關係，但係有啲嘢有做過就係有做過，「我幫過某個人」係一件事，「我有挪用籌款去用」係另一件事，阮民安一到英國就想「洗底」，係咪驚啲人唔再捐錢畀佢？所謂英國「新生活」，對其他移英港人而言，就係工作賺錢同養家；對阮民安而言，可能就係繼續食「黃絲水」、「黑暴水」，「手足」真係要小心喔！
喺網上，唔同嘅人對阮民安嘅態度非常兩極，有人繼續支持佢，亦有人擺明對佢有懷疑，甚至表明對此人「不予置評」，串咀啲嘅，問佢喺英國開咗賭博戶口未嘅都有；筆者就咁睇，若然有啲人之後不斷聲稱要「幫人」，繼而又不斷籌錢，大家可能就明白佢去英國用「技能」照顧家人，到底係咩「技能」喇。
收藏
取消收藏
分享
