點新聞 ｜ 每日點新聞 點解香港事

【點新聞報道】古天樂（古仔）以嘉賓身份亮相的多媒體頻道真人騷《尋泰記》昨晚（19日）播出第五集大結局。前四集古仔與兩位主持混血肥仔（曾達恩）和丁丁（丁彥均）玩轉曼谷多個地方，今集他們便挑戰終極抽籤互相懲罰遊戲，將系列推至最高潮。

「泰國天下一CEO」Bobbie挑戰坐「篤篤車」唱泰文版《幪面超人》主題曲，更安排他到人山人海的曼谷四面神神壇附近表演，想他在人群面前大感尷尬，豈料沒有人理會他做甚麼，全因所有人的目光都集中在後面「食花生」的古天樂身上，期間更有當地婦人抱起小朋友衝向古仔身邊，搞到不明所以的古仔笑爆嘴：「做乜啫？做乜拎個𡃁妹過嚟？」他更笑住「模仿」對方：「我畀你啦，我唔養喇！」

之後就有混血肥仔抽中泰國獨有的「抓龍筋」按摩，技師不斷用力按壓他的下體，搞到他痛到哭笑不得、面容扭曲。至於古仔就抽中了穿泳衣這個終極挑戰，混血肥仔等人安排了三款泳衣供他選擇，分別是沙灘褲、滑浪防曬衣配三角泳褲及一件頭連身平腳泳衣，結果古仔就揀了平腳泳衣，震爆網絡。

古仔又在節目中談到「開心」這回事，他坦言工作已經令他非常快樂「拍完一樣嘢之後會覺得『嘩，總算拍到喇』，好有滿足感㗎嘛，我諗過程就係最開心。（好少情緒？）我覺得冇乜嘢好勞氣，冇乜嘢好嬲，有時咪當笑話聽，即係用一個輕鬆啲嘅方法去面對一件事。」古仔更透露肯作客亮相的原因：「咁樣幾好，新生代同我哋而家一齊合作，諗法應該更加長遠先得，所以我都要體驗下喺唔同嘅範疇裏面應該可以發生咩事，就唔好話用一個觀賞態度，『好好玩好好睇』咁樣，點解唔上嚟試下做一次呢，呢個先係最緊要。」

（點新聞特約記者陳惠芳報道）