文/稀思路
過去一段日子，抹黑香港特區同中央，基本上係美西方勢力嘅「國策」，有人可能會覺得每逢香港有重大政策，都係美西方勢力出動嘅時候，其實，依家嘅情況係，佢哋有事冇事，都會搵機會唱衰抹黑香港。例如，英國就會定期發表所謂「香港半年報告」，即係定期抹黑香港種種情況，但筆者睇相關內容，根本就係超錯！
今次英國發表所謂「報告」，其外相卡梅倫就稱香港國安法有違《中英聯合聲明》，又指《維護國家安全條例》立法過程「匆忙，或不符合國際人權法」；筆者仲留意到，報告有提到前壹傳媒創辦人黎智英嘅案件，卡梅倫仲要特區政府「釋放本身是英國公民的黎智英」，甚至要求中央撤回香港國安法。筆者有個疑問，英國政府咁樣歪曲香港國安法以至《維護國家安全條例》，算唔算係屈得就屈？
卡梅倫以至「報告」講嘅嘢，其實完全無事實或法理根據，先唔講《中英聯合聲明》已經係歷史文件，係過去式，《聲明》從來冇講過中央唔可以為維護國家安全立法，而係指明國防事務屬中央人民政府管理。至於《維護國家安全條例》，如果話特區政府「立法匆忙」，筆者上網睇到資料，美國嘅《愛國者法案》用咗45日通過；攞亞洲地方作例，新加坡嘅《防止外來干預(對應措施)法》，由提出到通過就係用咗三個星期。相比之下，香港就《維護國家安全條例》嘅立法時間係咪「匆忙」，美西方勢力可以商榷下，但筆者一定要講，由香港回歸祖國至今，等待基本法第23條進行本地立法，係等咗接近27年！
香港國安法或者國安條例，美西方勢力好鍾意將法例同人權拉上關係，但筆者好肯定，人權同國安條例根本就冇牴觸，唔同地方要維護人權，但前提都係要保障國家安全，就如《公民權利和政治權利國際公約》，第19條講明自由權利會喺保障國家安全嘅情況下受到限制；第20條講明「任何鼓吹民族、種族或宗教仇恨之主張，構成煽動歧視、敵視或強暴者，應以法律禁止之」；第21條就講到和平集會可能會喺「維護國家安全、保障他人權利自由所必要者」情況下受限。第22條就講到結社自由，不過一樣係提到喺維護國家安全嘅情況下會受到限制。
真理愈辯愈明，英國以至卡梅倫講嘅「人權」，到底係指什麼？2019年黑暴運動時，暴徒打砸搶燒，係咪「人權」？揚言要搞軍隊、分裂國家，又係咪「人權」？叫外國制裁香港，係咪又係「人權」？一句人權，再加一句自由，講就好響亮，但唔該英美等國家唔好抽離香港嘅現實情況，因為香港國安法以至國安條例，所針對嘅係可能危害到國家安全嘅極少數人，如果相關人士喺英美等國家搞事、犯法，一樣會受到法律制裁。
「報告」有一點極為荒謬，就係話黎智英係英國公民，特區政府要「放人」，呢種說法真係令人無語，黎智英涉嫌觸犯香港國安法，佢應該喺法庭受審，而唔係要政府「放人」；佢仲有其他罪行包括欺詐罪在身，英國嘅說法即係黎智英唔需要繼續服刑直接放人？呢種要求係咪英式笑話？有一件事，香港市民以至國際社會都要分得好清楚，美西方國家講嘅嘢，表面係道理，實際係歪理，只要我哋諗真啲、諗深啲，就會知道佢哋係針對香港，而且，如果按佢哋嘅想法去做，香港一定會出亂子，2019年就係慘痛而又活生生嘅例子。
收藏
取消收藏
分享
