【點新聞報道】《炎明熹Gi-FORCE演唱會2024》昨晚（13日）演出二場，獲Gigi的父母、好友姚焯菲及森美到場支持。她曾說好感謝自己條「腰」，來到第二場跳舞力度明顯加大，Gigi打後空翻，唱到《Little Magic》時，台下的歌迷起身齊齊跟着跳舞兼大合唱，氣氛比起首一場更熾熱。
演唱會中段，Gigi與樂迷打招呼，她原本要獻唱《流沙》，但她突然撥弄鼻樑位置，說：「我係咪跌咗少少嘢？」原來是眼妝的閃片掉落，她在台上整理期間不經意做了鬥雞眼，蝦碌場面引來全場哄笑。
到嘉賓環節，Gigi請來在電視劇《青春本我》中飾演她爸爸的姜皓文到來，兩父女難得同台，姜皓文指近日有睇新聞，知道「囡囡」拍《還有一艘救生艙》 MV時演技大爆發，鏡頭前話喊就喊，於是被演唱會導演吩咐，上台考驗Gigi演技，要她即場展示「喜怒哀樂」情緒，Gigi自嘲演戲時總是尷尷尬尬，姜皓文安慰她說：「咁我個女啲喜怒哀樂表情係差唔多嘅，但係佢呢個招牌笑容，真係第二個搵唔到。」之後到Gigi「禮尚往來」，考驗「爸爸」演技，身為演技派，姜皓文駕輕就熟，還特意誇大表情搞氣氛，令台下笑聲不斷。
互考演技後，姜皓文還在台上爆笑料，指當日拍劇期間，大夥兒叫糖水宵夜：「咁我哋畀張糖水紙佢揀，佢就問係咪點叫都得㗎？我話『係吖，你叫幾多碗都得。』跟住佢話『嘩，你哋好有錢呀！』我呢個女真係單純到好可愛，搞到我呢個做爸爸嘅有啲擔心，我當然唔驚台下嘅觀眾呃你，因為你哋錫佢都嚟唔切。」
接着，Gigi送上繡有Black Pa（黑爸）的運動毛巾答謝，姜皓文則祝福Gigi，希望她可以紅遍整個宇宙。演技一流的姜皓文原來一樣唱得，大開金口獻唱Gigi的《好想約你》，緊接姜皓文再送上《鐵塔凌雲》，台下掌聲如雷。
另外，校長譚詠麟雖然未能親身前來欣賞演唱會，但非常有心，昨日趁Gigi綵排期間，帶同果籃抽空到場支持，之後更在社交網站發文，讚Gigi外型和唱功都是可造之才。Gigi對校長的支持表示感激，她說：「好開心校長咁忙都嚟睇我綵排，佢嘅支持畀咗好多信心我，真係好多謝佢。」
此外，Gigi的新歌《還有一艘救生艙》，MV於YouTube上架短短四日，已超過100萬點擊，開show期間新MV照樣被樂迷狂loop，榮登熱門音樂影片第二位。
（點新聞特約記者陳惠芳報道）
收藏
取消收藏
分享
