【點新聞報道】在《愛回家之開心速遞》飾演熊心如的蘇韻姿（Andrea），之前被指開工經常遲到而遭「雪藏」。自調離劇組後便被安排做綜藝節目，直至她有劇集拍攝，外間都覺得她已被解凍，卻突然發現其在無綫官網上已被除名。
蘇韻姿在社交平台宣布離巢，並上載8年前參選港姐時的照片懷緬一番。全文如下：
「依家係時候要跳出自己嘅舒適圈，接受新嘅挑戰啦。
不經不覺嚟咗香港八年，我已經成長咗好多，學到好多嘢。喺呢一度遇到好多錫我嘅人，實在係好幸運。
首先要多謝珍姐（曾勵珍），喺我一個人嚟到香港嘅時候，俾（畀）機會我演熊心如，令到我喺香港都可以有一個家。亦都令到多左人認識我、有不同嘅工作，學到好多中文。多謝您咁多年嘅教導栽培。我會好好謹記你教我嘅一切。
多謝樂小姐（樂易玲），由選美到入行，一路都好照顧住我，教我點樣做好一個藝人。仲有Management嘅同事，多謝你哋一直嘅照顧及幫忙，我會加倍努力！
多謝志偉哥（曾志偉）！你嘅指導，加上鼓勵，令到我發現自己可以有好多可能性。我會keep住你俾（畀）我嘅正能量。
多謝監製祥哥！喺拍攝愛回家呢幾年嘅鼓勵、你對拍戲嘅熱情、創作力，有直啟發我，真係好榮幸能夠同你合作！
多謝監製佳導，俾（畀）個好好嘅機會我參與黑色月光，令到我見識多咗，學咗好多嘢，非常期待套劇播出！
仲有好多謝俾（畀）機會我嘅綜藝監製們，我知道自己嘅經驗少，所以感激你哋信任，俾（畀）我去嘗試不同嘅工作！多謝熊家人，冇家人喺香港嘅我，感恩有你哋就有家嘅感覺。
最後要多謝關心同錫我嘅台前幕後朋友仔！等緊埋位，或者收工嘅時候都會同大家一齊傾偈。我會記住一齊渡過過嘅美好時光！相信喺未來大家一定能夠再遇到，亦都想藉呢個機會衷心祝福所有朋友，能夠在自己嘅舞台上發光發亮。」
（點新聞特約記者陳惠芳報道）
相關報道：
收藏
取消收藏
分享
稿件由上傳 · 文責自負 · 不代表本網立場
