【點新聞報道】劇集《逆天奇案2》昨晚（4日）一集展開新單元「龍頭棍風暴」，劇情講述姜大衛（John哥）飾演的社團洪勝話事人打算退隱江湖，演他兒子的林景程和翟威廉欲爭話事人之位，兩雄相爭引起警方高度關注。
林景程受訪時坦言能夠與John哥合作感到好開心：「同John哥呢種咁傳奇嘅演員演戲，可以近距離感受佢點樣去演一場戲，呢啲機會真係好難得，覺得對演戲嘅人嚟講，John哥真係可以講得上係活寶藏！」景程透露有向John哥請教演戲心得：「我記得未埋位前請教過佢，會用咩方法投入角色嘅感情同點樣控制淚水，佢真係毫不吝嗇咁分享，仲即場示範點樣控制淚水畀我睇，睇佢做好似好容易咁，但實際真係幾十年功力！同埋John哥分享期間，咁啱導演叫我埋位拍攝，我諗嗰次係我入行以嚟最唔想埋位嘅一次！」
林景程早前在《下流上車族》與金像獎影后鮑起靜結母子緣，如今再與「亞洲影帝」John哥結父子緣，名副其實是「影帝影后御用仔仔」，對此景程直言感到十分榮幸：「兩位都係我以前諗都唔敢諗可以合作到嘅前輩，而家仲可以演到佢哋個仔，坦白講呢啲機會真係可遇不可求。我覺得我比好多演員好彩，希望未來仲會有呢啲機會啦！」
飾演小三Jenny一角的王嘉慧（Cathy）化身性感尤物，上演「小三爭上位實錄」，與平時斯文形象反差極大，引來網民關注。Cathy受訪時自爆是《逆天奇案》粉絲，她說：「第一輯係全部都有追睇晒，覺得自己有份參與《逆天2》好神奇，好開心同埋感恩。」
（點新聞特約記者陳惠芳報道）
相關報道：
收藏
取消收藏
分享
稿件由上傳 · 文責自負 · 不代表本網立場
