不少情侶因移民英國的志向出現分歧，導致感情破裂，甚至分手收場。近日有位正打算移民英國的港女在網上投稿，大呻自己早前與已經男友達成共識移民到英國，但男友移民前突然失業，仲唔生性經常花天酒地，雙方因此嗌交，男友更提出分手，令事主不知所措，決定問網民意見。
該名移英港女在fb群組「英國香港人生活交流區」發文指，原本打算跟男友在今年初一齊移民到英國，但他在移民前突然失業，之後佢就諗住去到當地先搵工，冇工作幾個月，經濟就一定好緊張，「我都唔介意日常開支我畀住先，點知佢仲成日同佢班朋友花天酒地，成日就話走啦見多幾次，之後唔知要幾耐先有得見」。雙方因此嗌交，男友執拾細軟、搬離二人愛巢，提出要分開冷靜，更在3日後向事主提出分手、唔去移民，「話經濟壓力好大，同我相處壓力更加大，話好多嘢都係我逼緊佢咁。」
事主提到，由於在英國已經租咗樓及傢俬，連男友家人送的私家車都運抵英國，所以就按原定計劃到英國。男友原本應承會陪她到英國2星期，「等我安頓好晒先返嚟搵工」，但最後都沒有兌現，「我一個人坐14個鐘頭機，一個人攞咗4、5件行李，由上機到落機再去到間屋真係好辛苦，我去咗個邊3個星期，每日都流好多眼淚，每日都好抑鬱、好難過。」
由於男友已搬離二人的愛巢，事主在英國生活期間收到一封email，發現「香港有好多手尾佢都冇搞好，例如退租等等，屋企嘅所有嘢佢都冇搞。」事主決定回港處理相關事宜，發現男友一直話搵工但都未搵到，「佢畀我感覺係冇動力去搵工，反正食屋企住屋企，就連之前要找卡數都係問阿媽之前畀佢去移民嘅錢找」。
反之，事主都有試下搵香港同英國工作，有數份英國工作都有線上面試機會，事主思前想後，「係咪我自己過去先會好啲？」，認為男友「20幾歲人仲黐住阿媽，有咩事淨係識搵阿媽幫手，我真係覺得好失望好攰」，「雖然我都仲係好唔捨得佢，仲有諗住想同佢一齊返，但我而家真係唔知點揀好？」帖文引來大批網民留言，大部分都支持事主分手，長痛不如短痛。
收藏
取消收藏
分享
