【點新聞報道】日前「三八婦女節」，英皇娛樂集團營運總裁霍汶希（Mani）獲麥當勞邀請到其全新總部演講，分享作為女性成功之道的自身經歷。
外表剛強的Mani，演講期間發揮其幽默感，不時令員工捧腹大笑。Mani從她第一份暑期工說起，「我第一份暑期工係做連卡佛。可能當時我係最細，俾人恰就梗㗎啦!」雖然如此，但當時Mani心中已下定決心有一番作為，呢個係我對自己嘅要求。真係唔係講笑，我走嗰年，我做咗一年咋嘛，我係全個floor嘅第三位，但我賣嘅係junior fashion、好平嘅嘢，我好開心。」
Mani自言「唔安分守己」，她以茶水部作比喻，「就算我係做茶水部，我都想管埋廁所部門啦，係咪都管多幾個部門吖嘛，可能有朝一日可以管埋廚房，總廚都做埋，我係用呢個理念。當你個版圖擴大，你就會自然一級一級咁上。」於是她39歲那年，決定跳出舒適圈，主動申請到內地工作，那年正是她經理人生涯的巔峰期。移居北京第一個星期，很開心，但一個月後便抑鬱起上來。不過，她認為去到一個新地方除了要適應當環境、融入當地文化，更要學習。
在跟員工的互動環節中，有員工問到如何handle或帶領「Gen Z」時，Mani便以教女作比喻，她坦言「教女係最！難！」她謂以前教藝人，藝人的母親十分感謝她，因為藝人都聽她的說話而不聽他們母親的說話，「呢個年代要認同佢哋之餘，要用啟發嘅方法，我唔會同佢哋講應該做啲乜。好似我個女咁，佢唔肯彈鋼琴，佢話：『我唔彈啦。』我話：『小朋友一定要學一個樂器㗎喎，你自己揀啦。』佢話打鼓，打鼓喎，我真係入精神病院。我話：『打鼓都唔錯，但係表姐又拉二胡喎，其實二胡都唔錯、古箏都好嘅，但我覺得拉二胡好適合你，你可以同表姐交流吓。」引導佢，等佢講咗出嚟先，最後佢話：『又係喎，咁二胡啦。』咁佢就拉咗八年啦。路係佢自己揀，你不能揀條路俾佢行，（假如）你揀條路俾佢行，佢一定唔行！引導，同埋俾幾樣嘢佢揀，揀完之後，你意見接受但一切照舊嗰啲呢，哈哈。」全場頓時掌聲四起，演講亦於一片歡樂的氣氛中結束。
（點新聞特約記者陳惠芳報道）
收藏
取消收藏
分享
