無綫選秀節目《亞洲超星團》召集人曾志偉，日前宣布9名勝出練習生，組成男團LOONG 9正式出道。網民對團名議論紛紛，前E-Kids成員、「奀星」阮民安(Tommy)亦乘機抽水，聲稱曾志偉當年想替E-Kids取名「A4」，好彩在其再三堅持下，最後先可以改返一個比較易接受啲嘅名出道喎。不過，就被E-kids前成員林詠倫（Alan）篤爆講大話，直斥阮民安抽水攞光環，指「我可以好肯定A4唔係曾志偉改」。
Alan昨日於社交平台發文篤爆阮民安講大話，指：「我可以好肯定A4唔係曾志偉改，E-kids又肯定係公司改~好心唔好成日抽水攞光環喇！」林詠倫激動爆粗說：「因為未出道時係4個人，當時經理人改叫『A4』不是曾志偉改的，第二笑A4紙是當時出席某D活動，我哋經理人介紹俾林珊珊識時（珊珊姐）就開玩笑說4A?紙嚟㗎？講真有時唔好咩都出嚟認屎認屁~平時你點話依個話個個都無所謂，但咁屈X以前扶持過你嘅人我就忍唔住（冒住俾人X我都係咁講）要記住你自己風光時就係度X eKids隊友，有水抽時就爭X住光環，真係人無恥便無敵」。
之後，Alan開直播再討論改名事件，Alan坦言志偉是E-kids恩人，自己絕不會這樣批評對方，當中更質疑Tommy：「嗰個人始終幫過你，如果係我都唔會咁樣講，睇得好唔開心，嗰個人幫過你，而家飛黃騰達你就會對人好嘅；但如果幫過你，你自己唔得嘅，一有啲咩你就去『擾』人，咁邊個同你玩啫？」Alan續說：「有人話阿邊個咁樣講，係咪真㗎，我會問，你覺得呢？唔怪得佢哋，佢咁講人哋咪信囉，但係你可以當我同阿Tim死嘅？可以自己咁樣去講，我覺得好搞笑囉！你唔撈啫，大家都撈緊，唔好搞到得罪晒啲前輩，講真，冇佢就冇我哋今時今日。」
Alan並親解「A4」隊名是由於組合起初有4位成員，其中一位是《中年好聲音2》參賽者高偉健，除了「A4」，更曾構思過「花刺」、「新人類」，而「E-kids」是由Tony Chiu所改，Alan說：「唔尊重唔緊要，唔好誣捏人。」
最後，Alan再發帖指：「事實勝於雄辯，只不過唔想大家被騙，還有本人在EK(E-kids)解散後並沒有所謂投靠StarEast任何一位老闆搲撈(完)。」
收藏
取消收藏
分享
