筆是機場｜美總領事梅儒瑞　擺明想愚弄香港

文/稀思路

基本法第23條立法，當中要義，就係要進一步堵塞國家安全嘅漏洞，呢個道理香港市民明白，國際社會都應該明白，但問題嚟喇，點解外國勢力嘅國安法更多、更嚴、更辣，但係仲要針對香港特區就23條立法呢？事情唔駛諗得咁複雜，就係外國勢力針對中國！之不過，近日美國駐港澳總領事梅儒瑞（Gregory May）受訪時嘅一番言論，就特別值得譴責，一個駐港總領事，唔係應該同香港各界等做好溝通橋樑工作咩？人在香港工作，又在干預香港，玩咩？

有傳媒形容，梅儒瑞「罕有地」受訪，從佢過往歷史嚟睇，可以話係「罕有地」受訪，但其實又唔罕有喎，因為擺明就係抹黑23條立法，讀者可以睇下梅儒瑞講乜，基本語調，就係反23條立法，只係佢嘅講法同其他人有少少唔同，話「在香港國安法通過之後，香港最不需要的就是更多、涵蓋範圍非常廣泛的新罪行」。

筆者先唔嘗試直接去反駁梅儒瑞嘅講法，但讀者可以設想一個情境，就係美國喺當年911襲擊後，國家安全法「全面加辣」，其他主要國家都予以理解，因為911嘅襲擊情況的確令人震驚，如果當時美國為國家安全法「加辣」，而其他國家話「我覺得美國唔需要更多國家安全法」，美國政府以至美國人會唔會嬲？將心比己，香港經歷黑暴運動，被破壞嘅係政府同私人物業，被襲擊嘅係香港警察同香港市民，美國駐港總領事無受過影響，憑乜嘢去判斷香港唔需要更多立法或罪行？

仲有一樣嘢，美國駐港總領事，即係作為美國駐港「代表」，佢到底係代表美國做嘢，定係代表美國搞嘢？長久以來，國際關係嘅一個重要原則，就係互不干涉內政，一個被美國派嚟香港嘅駐港總領事，嚟香港竟然係搞事？如果情況倒轉，特區政府嘅駐美國人員咁做，讀者認為會點？一個可能嘅結果，就係該辦事處被迫「關門」；可能梅儒瑞係代表緊美國嘅政治立場，但係一個領事，有佢嘅本分同規限，做越界、踩界嘅事係非常危險。

老老實實，梅儒瑞喺訪問中，其實都有相當多嘅謬論，例如佢提到特區政府對「民主派的打壓」，會對美國公司產生影響，類似嘅說話，如果用相反意思去講，可能更為合理。特區政府喺黑暴運動前後，依法檢控涉及唔同罪行嘅政客，佢哋嘅所作所為，無論係涉及暴動嘅、涉及勾結外國勢力嘅，以至係涉及其他刑事罪行嘅，處理破壞社會安寧嘅人，理應對外商更有保障。一個好容易設想到嘅情況，就係做生意嘅，會想一個投資地方穩定，還是唔穩定？

梅儒瑞以至其他美國政客對香港攬炒派嘅「支持」，筆者認為大家唔好誤會，以為係咩「支持民主」、「理性發聲」，佢哋支持攬炒派，最大理由係因為香港攬炒派政客係佢哋「敵人嘅敵人」，佢哋用把口去支持攬炒派政客，十分廉價，而黑暴運動失敗，都係攬炒派政客自己去找數，美國「無損失」。之前，有報道指黃之鋒喺被捕前，曾經想入美國駐港總領事館尋求保護而被拒絕，點解？因為美國係借佢哋搞香港、搞中國，佢哋有事「係佢哋自己嘅事」，美國「無義務」要幫佢哋呢！精人出口，笨人出手，係千古不變嘅定律。