【點新聞報道】陳蕾首個個人演唱會，昨（2日）晚起一連四場在紅館舉行，全場爆滿，氣氛熾熱。她又同觀眾分享自己曾經歷過高高低低，更曾一度哽咽。
是次陳蕾演唱會分為《死》、《惑》、《念》、《生》及《能屈能伸》五大主題，演唱會一開始，一頭銀髮、戴着白色如婚紗頭飾的陳蕾，坐在十字架棺木造型鋼琴前登場，自彈自唱一曲《我想和你好好的》為個唱揭開序幕。
之後陳蕾爬到鋼琴上高高站着除去頭紗，告訴大家人生就像《荒島之幻像》，畫面一轉槍聲爆炸響起，她連人帶「血」躺在琴上唱出《荒島之幻像》，影像把歌詞活生生呈現到觀眾面前，失血中的傷口，沾污了血拿着咪高峰的雙手，歌迷尖叫聲雷動。當陳蕾於台上高呼：「第一場Good Show！」 更令現場氣氛熾熱萬分。
進入第二部分《惑》，換上黑色低胸裙的陳蕾非常性感。第三部分《念》，舞台上有多位雜技表演者呈現精彩演出，換上綠色連身裙、披着黑色長袍的陳蕾，在離地面4米半高的升降台獻唱。第四部分的《生》，陳蕾先後換上紅白格仔裙及白色吊帶短裙，將現場變成嘉年華，台上、台下同樣High爆，陳蕾帶領觀眾舉手揮動，不少人更直情站起來，隨音樂搖擺身體，余香凝、廖子妤和梁祖堯也被感染一起瘋狂。
去到最後一Part《能屈能伸》，曾為ViuTV選秀節目《全民造星V》擔任導師的陳蕾，找來學員亨仔、Nathan、Kim及Tiger Foo合體夾Band，一起跳出MV演繹現場版《伸縮自如的愛》，陳蕾亦換上她最愛的針織民族風服飾，大騷玉背，5人默契十足，再次掀起高潮。
唱足全晚的陳蕾終於「講嘢」，她先正式跟大家打招呼：「大家好!」她笑謂：「多謝晒，我終於可以講嘢啦，我開騷導演唔會畀我講嘢㗎，話即刻冇晒氣質呀。」引來全場笑聲。她說，坐在鋼琴前升上台到演唱會接近尾聲這一刻，自己很享受每一個時刻。陳蕾坦言：「瑕疵一定有㗎，但你哋寧願睇我小心翼翼，定係帶住瑕疵放開嚟唱，我都會擁抱所有嘅瑕疵，而家有好多科技會令到演唱會嘅聲音會完美少少，但我哋冇呢啲嘢嘅，走音嗰啲由佢走，人性嚟㗎嘛，呢啲都係我當下嘅情緒。」
去到演唱會尾聲，陳蕾愈講愈起勁，在鳴謝環節足足講了半小時。終於來到最後一首歌，她感觸說：「呢首可能係我暫時最多人聽過嘅一首歌啦，而呢首歌也收到好多來信、Inbox，話呢首歌畀到力量佢，喺佢最迷惘嘅時候，佢都好相信呢句說話……」陳蕾忍不住哽咽說：「誰都可發光，只要找對地方。」接住，她唱出《凡星》，全場觀眾也跟隨着變身萬人大合唱，歌聲震撼整個紅館。但完騷後，觀眾不夠喉狂呼encore，群情洶湧。換了一身輕便服飾的陳蕾千呼萬喚下再度登場，她笑言：「而家啲文化咁嘅？好似每個騷未見到歌手着自己嘅產品出嚟都唔死心。偏偏我就着出嚟畀你哋欣賞下，純粹喺台上兜個圈，話知你哋。」期間不少粉絲高呼：「陳蕾世一！」
最後，陳蕾認真說：「今晚好多人嚟睇我演唱會，其實好多年前都冇乜人睇過我表演嘅時候，我就係孭住支木結他喺網上拍cover，亦試過busking，去唔同嘅市集唱歌，我都有諗過放棄音樂嘅，嗰陣覺得我係咪更適合做個手作人呢？唱咗咁多年都冇乜特別，亦唔覺得自己寫啲歌特別叻，但我好多謝自己所有高高低低嘅經歷，令我寫到咁多隻歌。如果你而家正經歷緊低潮，冇嘢㗎，咁先係人生㗎嘛。」話畢，陳蕾自彈自唱王菲的《夢中人》為演唱會畫上完美句點。
（點新聞特約記者陳惠芳報道）
相關報道：
收藏
取消收藏
分享
