靠食老本勉強生存　移英港人唔想衰畀港親友睇

人在異鄉，一闊三大，十分難捱。一個移英港人的fb群組本月初發文，問同路人「有冇人就嚟撐唔住呀？」旋即吸引有不少人大吐苦水，直言不想被香港親友得知自己節衣縮食，甚至依靠「食老本」度日，坦言在當地難言生活，只是勉強生存。

該名移英港人「JO Yau」今年元旦在群組發文稱，「Cost of Living（生活成本），有冇人就嚟撐唔住呀？」帖文收到300多個回覆，一家四口移居曼徹斯特的網民「Lee Chi Keung」承認，「來了一年，每月仲未能夠收支平衡，仲要部分食緊老本，湊（兩個）小朋友，返工時間有限制。」網民「Ashley Tam」稱，「我哋一家三口嚟咗年幾，到埗第二個月先生就搵到工，但係到手份糧交咗租，council tax（市政稅），一半電煤（費用）後已清袋，額外所有錢都係食緊老本。」網民「Delon Yeung」更稱，「窮、什麼都貴，忍下。」

網民「Wan Wan」直言，夫妻二人還在從事最低工資工作，不敢養育下一代，「本身兩公婆唔夠錢使已經成日唔開心，日日要喺屋企自己煮自己洗。想出街食餐好嘅都唔敢，因為實在太貴。又唔可以畀香港啲親戚朋友知道喺英國出街食飯都無錢，仲要成日等超市收工前減價，睇下有冇減價先買，根本已經唔係講quality of live（生活質素），只係生存喺度做奴隸！」

網民「Lcy Ling」奉勸有意移民者應當三思，「所謂嘅『自由空氣』，過咗海就神仙！飲水思源吧。是因為過去呢個地方帶給你近乎全球最低稅高薪的環境，你今時今日先有機會嚟到！我成三十有多，當時老公就係為咗所謂下一代我先跟佢嚟，但係而家都有啲卻步唔想生。」