肥媽李鼎打大佬｜游嘉欣搵夠400萬退休　肥媽反嘲太天真

【點新聞報道】肥媽、李家鼎（鼎爺）及游嘉欣（游游）主持的飲食節目《肥媽李鼎打大佬》，本周播出最後三集，兩老繼續捉住游游痛腳玩針鋒相對大放笑彈。

節目中談到理想退休年齡，肥媽鼎爺永不言休，游游竟笑言想40歲左右退休。肥媽：「咁咪即係唔使做？你諗住吊金龜算喇？」之後肥媽追問游游認為一個月多少「使費」才足夠，游游講出後，肥媽大讚游游「娶得過」！游游更言說：「假使我40歲開始唔做嘢，假設自己活到80歲，咁我仲有40年人，我估要400萬？」兩老聞言即大呼「冇可能」，游游愕然：「400萬都唔夠？」肥媽更一句KO游游是「食爺飯，着乸衣」（意指靠屋企人），游游聞言一臉慚愧謂：「都係嘅，同屋企人一齊住使費比較低！」

游游即時向兩老請教儲錢大計，肥媽說：「以前阿媽教我哋，一出糧就要買金戒指，幾薄都好。咁到年尾就有12隻，夾埋就可以換隻大啲嘅（戒指）。」鼎爺則認為最緊要識忍手：「例如我鍾意嗰樣嘢，我依家唔夠錢，我就下決心捱多兩組（戲），儲多啲（錢）就買到架喇。」肥媽與鼎爺還追加分享「襟撈大法」，肥媽說：「要抵得諗咯！人哋叫你做嘢唔好問幾點收工，要做多過自己嘅本分。」鼎爺則以胡楓修哥做例子，著大家無論什麼年紀，工作最緊要識Enjoy。

至於後晚一集，肥媽自爆新年開騷逗利是秘技，並分享「賭城利是戰衣」必勝法是V領設計及兩個胸圍，肥媽續指最豐收一次是一場穩袋高達六位數「利是」，肥媽說：「（兩個胸圍）係用嚟攝籌碼，唔係攝利是！佢哋啲籌碼成五千蚊美金一個，若果唔戴兩個胸圍，有機會跌鬼咗。」肥媽又爆很少人夠膽埋鄭裕玲身逗利是。

（點新聞特約記者陳惠芳報道）