講真，移民真係好考驗一個人的適應能力，近日有移民加拿大的港男於網上大吐苦水，指自己以前喺香港月入3萬幾、任職公務員，但講到移加後的生活就呻到樹葉都落，直言「感覺好無希望」喎。
該名港男近日在連登討論區以「黎（嚟）左（咗）加拿大一年，感覺好無希望」為題發文，話自己原本喺香港任職公務員，人工都有3萬幾，與父母同住全幢「三層村屋」，仲「有車揸」。然而，「唔知做乜屎忽痕走去加拿大闖下」，結果喺當地要住喺阿叔放租的公寓，雖然話就話唔收租，但水費、電費、上網費卻要自行繳交。而「最好笑係自己（阿叔）換新車畀架5、6年前嘅舊車我揸，然後同我老豆講照顧得我好好！」
話說移加港人搵工難，樓主就直言「搵工唔洗講」，大呻當地公司無視他在港的工作經驗，只開出普通大學開入門職位，令樓主對晉升和職業生涯無望：「我喺香港做幾年公務員嚟到夠膽死唔計我經驗？全部當我普通大學生咁開entry position畀我，已經無諗咩晉升空間同career path」。
帖文引起網民熱議，有人批評樓主「香港做公務員有三皮就好勁？不如你問下自己有咩skillset係個市場需要㗎？」有人則勸說：「咁都捱唔到就返香港好過啦！你諗住嚟到新地方仲可以keep 返之前咁嘅生活水平，你無返一百幾十萬真係唔使諗！」
收藏
取消收藏
分享
稿件由上傳 · 文責自負 · 不代表本網立場
