文/稀思路
香港嘅打工仔，好鍾意講一樣嘢，叫work life balance，即係工作同生活要平衡；甚至有啲講得型啲，就話自己work hard play hard，即係努力工作，當然要盡情享樂。先唔講呢種想法來自何方，工作生活要平衡，努力做咗嘢要玩得開心啲，呢啲筆者都唔反對，但有時對住啲唔夠責任心又強調「play hard」嘅人，筆者會問呢啲人本身嘅嘢做好未呢？如果本身嘅嘢做唔好，然後又去咗玩，甚至擺出一副「呢單嘢唔係我跟開」嘅姿態出嚟，咁就會變咗乞人憎喇，今次又講緊邊個？就係美國總統拜登！
早前，《紐約郵報》就報道，美國總統拜登去年有138日喺度假勝地，佔比竟然高達37%，當中就以特拉華州為佢最鍾意嘅地方，佢好頻密咁利用周末返去自己嘅高級住宅同霍博斯嘅陽光海灘，喺嗰度過咗90日；但令人更尷尬嘅係，原來佢嘅度假日數已經比2022年少，2022年有成146日。
睇多少少數字，單單喺去年8月，拜登就休假20日，又入住價值過億港元嘅莊園，白宮就話拜登一家以市場價租住嘅。其實，講到度假日數，拜登已經「贏晒」所有歷任美國總統，最接近佢嘅係老布殊，任期內度假時間為36%；就算出咗名係富豪出身嘅特朗普，任期內都只係有26%時間唔喺白宮。咁證明咗咩？係咪拜登好識work life balance？但佢連工作都平衡唔到喎！
隨手睇下傳媒、網媒報道，美國國防部長奧斯汀被指隱瞞病情，入院治療一周卻未有公開，原來呢件事，拜登都要隔幾日先透過國家安全顧問沙利文知情，跟住暫代職務副防長又唔係好知咩事。我哋嘗試以一間普通公司嘅角度諗，一個下屬，唔好話入咗醫院，就算只係有事要請一日、半日假，老闆都應該知情，堂堂一個美國國防部長入深切治療部，總統竟然唔知？筆者想問下，嗰幾日拜登喺白宮定係度假緊？如果喺白宮，筆者想知拜登喺辦公室係辦公定「扮工」？如果度緊假，喺某處例如莊園、自家豪宅，咁基本嘢都唔知，點work life balance？
2023年嘅138日度假好，或者2022年嘅146日都好，讀者可以諗下，一年52個星期，假設一個香港打工仔每個星期都放周六、周日，然後又有大約15個公眾假期日放假，加埋都唔夠120日，但拜登去度假嘅日子，已經多過呢個數，一個為市民服務嘅總統，筆者真係想講，「你放咁多假，搞唔搞得掂啲嘢呀？」睇睇近年美國，畀人叫槍擊之國，又畀人叫罪惡之都，當美國最高領導都擺出副work life balance嘅樣子，美國政府嘅行政能力，應該都唔會高得去邊。
喺英美，劫案、偷竊案等不絕於耳，有人話係經濟差，但點解經濟差成咁？因為管理得唔好！點解管理得唔好？因為官員不務正業，英美等西方勢力好用力針對中國，如果佢哋咁有心對待自己國家，可能佢哋嘅人民生活都會好啲。踏入2024年，筆者估計經濟週期仲係下行階段，美國總統一邊度假，美國鬧市一邊出現大型搶劫、槍殺案，呢個對比，未免有啲諷刺！
收藏
取消收藏
分享
