【點新聞報道】今日（1月1日）是陳寶珠的77歲生日，她48歲的兒子楊天經在社交網站，貼出與老婆一同為媽咪陳寶珠在家中慶生照片，一家三口穿上家庭親子裝慶生。
寶珠姐今日接受一頻道主持電話訪問，問及生日願望？寶珠姐說:「希望世界和平，唔好再有戰爭，疫情快啲消失，每家每戶都健康快樂、平平安安，過一個好安穩嘅日子，亦希望冇天災人禍。」對於她近年成為「優雅地老去」的最佳代表，她說：「好開心！好多謝大家咁樣讚賞我，其實我都係平常心，無特別奢求，無特別欲望，只係好開心、好平淡過每個日子。」
寶珠姐直言近年喜歡待在家中：「我又唔係好鍾意咁多人，鍾意靜靜地喺屋企，做我日常嘅嘢，平平淡淡，心情同心態都係平靜嘅。我無咩諗㗎，就算唔開心都係剎那間。當然我亦無好大嘅事令我唔開心，你知道啦，年紀大有少少小器，哈哈哈！」至於有什麼小事令她不開心，她又說：「又無乜特別唔開心，譬如報章或者其他任何講嘅嘢，我都一笑置之，無乜所謂，因為每個人對你嘅睇法、感覺唔同，唔可以要個個都睇好，或者欣賞你。但有時老人家……哈哈。」她又多謝一班朋友、粉絲的厚愛：「我個仔又好錫我，新抱又對我好，仲有啲乜嘢啫，夫復何求。」
提到陳寶珠近年已經沒有再開生日派對與粉絲慶祝，寶珠姐解釋：「因為疫情一直唔敢同太多人一齊，好容易感染，要小心啲。我又覺得有返咁上下年紀，戲迷大部分同我咁上下，我都好擔心佢哋健康。因為佢哋一見到我就好興奮，我見到佢哋又好開心，我唔想佢哋跌倒或者有感染，咁就唔好啦！一家人食飯都一樣。」寶珠姐說今日生日與兒子及新抱外出食飯：「但就人少少囉，都好溫馨。」
（點新聞特約記者陳惠芳報道）
相關報道：
收藏
取消收藏
分享
稿件由上傳 · 文責自負 · 不代表本網立場
