文/稀思路
黑暴運動時，黑暴分子互相稱呼為「手足」，佢哋表示過要「齊上齊落」，不過隨住運動開始衰敗，佢哋當中有唔少人被捕同坐監，被遺下嘅「手足」，就變成咗「安全套」（Condom）；其實「手足變Condom」，係一早就預知嘅事，因為佢哋一班人，最終都係為自己。相同嘅道理，就係接收佢哋嘅國家，都可能會捨棄佢哋，最近英國就打算推出5項計劃，希望減少移民數目；雖然計劃並未直接指向攞住BNO移居英國嘅香港人、黃絲或黑暴分子，但將來嘅事，邊個肯定呢？
話說，英國內政大臣日前就宣布，將會喺明年春天起實施5項計劃，包括禁止醫護人員攜家人移英、提高外籍勞工每年國民保健費用逾6成等，以減少未來幾年嘅移民人數，有本港嘅移民顧問就表示，英國政府公布嘅方案暫時未波及持有BNO簽證而赴英國嘅香港人，不過當地移民太多，而BNO又冇審核標準等，可能英國政府未來有更大誘因去收緊BNO簽證政策。
英國想減少移民人數，其實一早就有風聲，筆者睇返之前嘅新聞，英國國家統計局幾個月就估計，2022年浄流入人口達到60萬人，創下新高，而英國首相蘇納克接受訪問時就表示，移民數字「太高」，又提到英國已經公布減少移民數字嘅措施；喺當時嘅訪問，蘇納克表明想將移民數字降低，又提到政府取消部分留學生帶家人陪同到英國嘅權利。其實，蘇納克之前亦都講過，話英國嘅合法移民數字過高，正考慮一系列選擇去降低佢。
同樣係今年年中嘅新聞，又有消息指英國內政部官員考慮將申請入籍前嘅持續居留年期，由依家5年延長到8年，雖然消息未有講明方案係針對邊類移民，但如果實施起嚟，當然亦有機會關係到攞住BNO入境嘅香港人。由英國最近嘅新聞、首相蘇納克嘅言論以至過去半年嘅新聞，都指向一個事實，就係英國嘅各種移民政策都正在收緊，或者有可能會被收緊。
其實之前筆者都講過唔止一次，所謂BNO「5+1」政策，唔係去到就成為「英國公民」，而係香港人去英國住夠5年，先再申請入籍，依家再睇英國嘅新聞，BNO「5+1」政策可能仲有好大嘅調整空間，例如5年會唔會變8年時間？又或者，「5+1」係真嘅，但住夠5年後申請入籍時會唔會畀有形、無形嘅關卡擋住呢？又係未知，一大班諗住移居英國嘅香港人，到頭來會否一場空，真係需要時間驗證。
早排有一單新聞引起廣泛注意，內容係講部分香港人去到英國冇工作或搵唔到工，筆者先當冇工作嘅人可能「錢多」或照顧家庭而無工作，但想工作又搵唔到工嗰啲可以點算呢？移民，係為咗更好嘅生活，但如果移民變成「憂柴憂米」，咁就難搞啲喇！一班移居英國嘅人，當中唔少人都明示暗示香港唔好，但其實香港唔係唔好，只係一啲死心不息嘅人，一直喺度唱衰香港「唔好」啫！如果英國去盡啲，香港移民會唔會變盧旺達難民？應該未必會，但狡猾嘅英國政府未來會用咩手段減少移民，真係「天曉得」喇！
收藏
取消收藏
分享
