後生仔冒長者$2乘巴士　司機發現停車「追數」獲激讚

長者八達通2元乘車優惠計劃，近年違規的情況愈見嚴重。有女網民日前發文表示，乘搭城巴948號路線時，有醒目司機發現有後生仔使用長者八達通卡，於是走到上層抽出該男子。事件引來網民熱議，大讚司機「做得好」。

女網民上周六（2日）於Facebook群組「青衣街坊吹水會」發文表示，當日搭城巴948路線返回青衣，「中途司機停低架車走上層，指住個男人話佢用咗長者八達通卡」。之後，個男人跟司機落車，再一次拍正價卡，之後上返上層坐。樓主又指，其實排她前面、目測40歲女子，都係用2元乘車優惠。

帖文引來網民熱議，不少人大讚「司機已經做到嘢」、「做得好，我交稅唔係畀呢啲人呃搭兩蚊車」、「噚日都見有個學生，用小童八達通拍咭，後尾個女司機嗌返佢落嚟問幾多歲，跟住佢死死氣話未買到」、「D人好決德，坐948一個站便要政府補貼17蚊」、「捉到應該要罰重啲，要守規則，做人的基本法」。

不過，有網民指出，「用2蚊除咗長者外，殘疾人士都可以，所以成日見到後生用2蚊!不過要先申請残疾證明文件及向車長出示(如車長要求之下)」。有網民則認為「其實八達通公司可否設計的卡，例如長者卡有個長者圖樣讓司機大佬一望清楚」。