文/稀思路
近日，網上出現一則帖文，引嚟各界高度關注、話說喺某個社交平台，一個自稱係羅冠鵬、即羅冠聰哥哥嘅人，發文表示自問係一個土生土長愛國愛港嘅中國人，除咗表示自己同羅聰三年多無聯絡之外，仲聲明要同羅冠聰正式斷絕關係，指羅冠聰喺外地不斷鼓吹「港獨」，同埋倡議外國制裁自己嘅國家同成長嘅城市，表明羅冠聰呢啲言行與佢無關。由網上報道可見，有唔少媒體喺度帶風向，一時話呢個社交帳號發帖唔多，一時又話第一個帖只係喺20多日前發布，質疑其真偽；其實，筆者都好鍾意同人分析下唔同嘢，不如等筆者又解拆下呢個「羅冠聰疑被親兄割席」事件簿。
如果大家有留意開逃亡海外嘅攬炒派動態，都會知道諸如羅冠聰、許智峯之流，事無大小，必定狂抽特區政府同中央水，好多時候仲擺明係抹黑，以引起反中亂港分子嘅「共鳴」；不過，今次羅冠聰就一反常態，竟然幾日前只以一句英文回覆媒體「I have no idea and no comment. Thanks! 」（我不清楚及沒有評論。謝謝！），係咪好唔尋常？以羅冠聰性格，如果有人扮佢哥哥同佢割席，而羅冠聰本人竟然會唔借機講一大輪嘢？件事真係吊詭！
相關嘅社交帳號係咪佢親哥哥，筆者相信羅冠聰係知道嘅，當然筆者唔敢100%話割席者一定係羅冠聰親哥哥，但羅冠聰係咪沉默得唔合理，讀者可以判斷。如果退一步講，我哋唔講羅冠鵬身份真偽，就應該睇呢則帖文嘅內容，內文指羅冠聰喺外地不斷鼓吹「港獨」、 倡議外國制裁國家同香港，呢則帖文講嘅嘢係咪冇錯呢？不論帖文係咪由羅冠聰哥哥發，呢則帖文確實係戳中羅冠聰死穴。
其實由羅冠聰嘅沉默，讀者仲可以睇到一樣嘢，就係羅冠聰都知道自己累街坊，今年7月，警方國安處就曾經帶走羅冠聰嘅父母以至哥哥去錄口供，了解佢哋有冇向羅冠聰提供經濟援助，以及係唔係羅冠聰喺香港嘅代理人。羅冠聰涉嫌犯嘅係香港國安法，如果要追查其資金來源、與唔同人嘅溝通，佢嘅家人都係調查點，所以羅冠聰在港家人，真係要「多謝羅冠聰」！羅冠聰今次默不作聲，除咗反映該帖文嘅可信性唔低，仲反映咗佢都知道自己「陀衰家」。
喺網上搜尋相關新聞，除咗有媒體以不同角度質疑帖文真偽，亦有媒體借機抹黑香港，但睇呢件事，應該係用相反嘅角度，就係有國安重犯離開香港，佢嘅家人被問話或者協助調查，都係完全合理嘅事，如果羅冠聰嘅家人有金援羅冠聰，仲可能會成為從犯，真係多得羅冠聰唔少。喺該則疑似由羅冠聰哥哥發布嘅帖文，最尾係話衷心建議羅冠聰回港面對一切，呢一步難行，但係正確嘅方向，「二哥只想和媽媽平靜在港生活」，言下之意，一係希望羅冠聰回港承擔罪責；二則係一人做事一人當，累埋屋企人，羅冠聰唔係仲好意思呀？
收藏
取消收藏
分享
