文/稀思路
美西方勢力成日有一種「好天真、好傻」嘅想法，佢哋以為自己為某人「發聲」係幫緊一個人，係「救」緊佢；但事實係，美西方政府好，政客也好，往往插手香港嘅事，都會令佢哋要幫嘅人更麻煩，就如喺黑暴運動期間，美國政客佩洛西曾盛讚香港示威者構成一道「美麗風景線」，結果呢啲風景線，即係一班香港嘅年輕人，就成為「上前線」嘅炮灰，一個又一個被捕，甚至要坐監。依家，美西方又瘋狂地要求釋放國安重犯黎智英，筆者認為，又係一種詛咒！
呢兩日睇新聞同評論，開始見到各界反駁美西方嘅謬論，之前幾個美國國會議員提出所謂法案，要求制裁香港49名官員、國安法指定法官以至檢控官，仲將黎智英案拉埋嚟講；之後，又有美西方等國家嘅宗教界人士，要求立即釋放「天主教徒」黎智英。一連串嘅行動，一來係要為黎智英「發聲」，二來就係干預香港，而且係連香港司法都想干預，但係，筆者會問黎智英嘅問題，到底係法律問題，政治問題，定係宗教問題呢？
黎智英涉及嘅案件，包括一啲已審理嘅案件，欺詐案好、等待判決嘅國安法案件都好，全部都唔係政治問題，而係佢涉嫌違法，執法部門就執法；如果因為佢同美西方關係好，或者因為佢就係美西方喺香港嘅代理人所以就免責，咁香港就再無法治可言。而且，2019年黑暴運動時，黎智英利用《蘋果日報》為黑暴煽風點火，如果咁都可以不受法律制裁，咁仲有法律可言？
至於宗教問題，筆者更加想同美西方或其他國家嘅宗教界人士講聲，「你唔好咁癡線啦！」美西方包庇香港黑暴分子包括黎智英，林林總總嘅藉口筆者都見過，如果「教徒」都可以成為免罪理由，咁係咪其他涉嫌犯法嘅人，都可以「信教保平安」呢？仲離譜嘅係，話黎智英係爭取民主而受壓迫，筆者想問下聯署嘅宗教界人士，知唔知2019年香港實際發生乜事？知唔知黎智英做過咩、講過咩？如果唔清楚又因為立場而企出嚟盲撐黎智英，咁係以宗教之名，錯誤支持犯罪之人呢！
筆者諗法好簡單，黎智英案唔用政治，亦唔會用宗教立場去講，而係用法律作為唯一尺度，香港行嘅普通法制度，包括程序公義、無罪假定以至法官嚴格按照法律審案等，都係美西方國家嘅法律制度，或者至少係近似嘅法律制度；將黎智英有罪或無罪問題交由法庭審理，最為公道，亦最為合適。如果美西方諗住向法庭施壓，即係以法治地方自居的國家，竟然去干預同破壞其他地方嘅法治，成件事十分諷刺。
最近，社會出現咗一陣風聲，話既然香港已經由亂到治，喺執行法律方面應該「鬆手」啲，唔好多用國安法嚟執法，其實，呢種說法有個誤區，就係認為社會氣氛有改善，執法唔駛咁嚴；但筆者都係講返一個道理，有人犯法，就要執法，執法人員喺不同情景，的確有時可能會有不執法嘅權利，即係大家所認識嘅酌情權（discretion），但係，喺涉及國家安全、特區穩定嘅法律，執法人員其實無酌情空間，因為如果「鬆手」，可能就會縱容到危害香港甚至國家嘅行為。一般市民打麻雀、玩啤牌娛樂下，尤其係同家人朋友玩，有時可以「鬆手」啲，但涉及關係到社會安寧嘅刑事案件，叫政府同執法人員「鬆手」啲，其實係會令社會危險啲！
收藏
取消收藏
分享
