【點新聞報道】無綫歌唱真人騷《中年好聲音2》，周日（12日）晚播出的一集是第四部曲《廿六強勁歌金曲淘汰賽！》，評審團除了有肥媽、伍仲衡、張佳添和周國豐外，還有李蕙敏（Amanda）暫替陳慧嫻出任評審。本回合26強選手爭入24強，而大魔頭安雅希選唱李蕙敏《（你沒有）好結果》，她面對原唱評審Amanda壓力倍增，更曾緊張到聲震，唱畢後更高呼好緊張。
雅希坦言事前不知道Amanda擔任評審：「知道嘅話我就換歌㗎喇。」對於安雅希的演出，張佳添說：「我會形容呢個係大步檻過嘅表演，好戥你擔心！」原唱Amanda則搞笑向雅希耍冧：「我真係唔好意思，我令你緊張咗好多。呢首歌本身個range係闊嘅，你唱Live如果唱得Below得太低，係好難出到個字，尤其是係廣東歌，不過我相信你唔咁緊張，係會表現得好好多，加油！」
另一實力唱將黃劍文頭幾輪比賽表現相對平穩，今集他挑戰女歌男唱——天后王菲的《給自己的情書》，周國豐說：「你喺Chorus方面嘅處理，我係戥你辛苦，好似同音樂玩緊追逐遊戲咁。」張佳添則說：「三拍歌其實好少咁用力去唱，結果你（演出）同編曲係兩件事，你係一個好有音樂感、音色好靚好入咪、好識唱歌嘅一個人，以上全部都係讚，但係唯一最大問題你係用錯演繹方法。」「奄尖魔人」伍仲衡聽完劍文的演出後更搖晒頭！
今集有感人的故事，獻唱《情深說話未曾講》的林偉璣坦言這首歌是獻唱給家人聽，他說：「唱『仍然在遠方，追我夢與想』時，第一時間已經係諗起爸爸媽媽。」偉璣透露父母一直很支持他追夢，他哽咽說：「佢哋好支持我，不論我年紀幾大都好，喺佢哋眼中我仍然係好細嘅小朋友，呢首歌係真心送畀佢哋，想同佢哋講，放心啦，我會繼續努力追尋我嘅夢想，我會唱更加多嘅好歌畀你哋聽，I Love You。」
（點新聞特約記者陳惠芳報道）
收藏
取消收藏
分享
稿件由上傳 · 文責自負 · 不代表本網立場
